Сурхондарёда, “Соғлом ва баркамол оила” мусобақалари вилоят босқичи якунланди
Бугун аҳоли орасида соғлом турмуш тарзини кенг тадбиқ этиш, оммавий спортни ривожлантиришга муҳим эътибор қаратилмоқда. Шу билан бирга, оилаларда китобхонлик маданиятини шакллантириш, унда улғаяётган ёш авлодни ҳам маънавияти етук, мустақил фикрлашга қодир инсонлар этиб тарбиялашга ҳам алоҳида урғу берилаяпти. Сабаби, спорт одамларнинг жисмоний соғломлигини кафолатласа, китобхонлик маънавий камолотга етказишга хизмат қилади. Республиканинг 3-сектор ҳудудларида яшовчи оилалар ўртасида “Соғлом ва баркамол оила” шиори остида ўтказилаётган спорт мусобоқалари ва китобхонлик беллашувларидан кўзланган мақсад ҳам шу аслида. Куни кеча, ушбу беллашувнинг Сурхондарё вилоят босқичи бўлиб ўтди.
Беллашувда туман босқичида ҳар икки йўналишда 1-ўринни қўлга киритган оилалар иштирок этишди. Термиз шаҳридаги Термиз давлат унверситетининг педагогика институтида бўлиб ўтган мусобақада дастлаб, мазкур спорт мусобақалари ва китобхонлик беллашувларини ўтказилишидан мақсад 3-сектор ҳудудида яшовчи оилаларни спортга қизиқтириш, маҳаллаларда оммавий спортни ривожлантириш ҳамда жисмоний ва маънавий етук оилани яратишдан иборат эканлиги таъкидланди.
Шундан сўнг, мусобақада оилавий жамоалар спортнинг шахмат-шашка, стол тенниси, бадментон, қувноқ стартлар каби турлари бўйича баҳслашишди. Китобхонлик борасидаги беллашув ҳам янада қизиқарли ва баҳсларга бой бўлди.
Натижаларга кўра, спорт мусобақаси йўналишида,
1-ўрин Термиз тумани 3-секторда яшовчи Отамуродов Янгибойлар оиласи,
2-ўрин Қумқўрғон тумани 3-секторда яшовчи Тошбоев Боходирлар оиласи,
3-ўрин Жарқўғон тумани 3-секторда яшовчи Чориев Тўйлилар оиласи,
Китобхонлик беллашуви йўналишида
1-ўрин Бандихон тумани 3-секторда яшовчи Холиқов Миржалоллар оиласи,
2-ўрин Жарқўғон тумани 3-секторда яшовчи Алламуродов Ханифалар оиласи,
3-ўрин Қумқўғон тумани 3-секторда яшовчи Оллоёров Тўрақуллар оиласи ғолибликни қўлга киритди.
Ғолибларни вилоят ИИБ бошлиғи, полковник А.Исмоилов табриклади ва уларга диплом, эсдалик совғаларини топширди.
Эндиликда, мутлоқ ғолибликни қўлга киритган оилалар, ушбу мусобақанинг Республика босқичида иштирок этишади.
Сурхондарё вилояти ИИБ ахборот хизмати
