Байрам шодиёналари эрта тонгдан вилоят туманлари ва ва Термиз шаҳрида веломарофон билан бошланди. Жумладан, Термиз шаҳрида веломарофон иштирокчилари Султон Саодат мажмуасидан Қирққиз обидасигача бўлган масофони босиб ўтиб, юртимизнинг сайёҳлик салоҳияти ва соғлом турмушни тарғиб қилди.
Шўрчи туманидаги 9-мактаб директори Улуғбек Исаев бошчилигида 8 - нафар ўқувчи велосипедда йўлга чиқиб, саккиз соатда Термиз туманидаги Ҳаким Термизий зиёратгоҳига етиб келди.
-Ўқувчилар билан тунда йўлга чиққан эдик,-дейди У. Исаев.-Вилосипедда 150 километр йўл босишнинг ўзи бўлмас экан. Тўғриси, биз манзилга тўрт соатда етиб олишни мўлжаллаган эдик. Жисмонан чаққон, соғлом, рухан тетик бўлсангиз велосипедда узоқ йўл боссангиз ҳам чарчоқ сезилмайди. Энг муҳими биз велосипедда зиёратга боришнинг ўзгача завқини чуқур ҳис этдик. Бутунжаҳон туризм кунида буюк аждодимиз Ҳаким Термизий мангу қўним топган сокин гўшани зиёрат қилганимиздан хурсандмиз.
Вилоятда Бутунжаҳон туризм кунига бағишланган турли тадбирлар давом этмоқда. Айни пайтда Термиз шаҳридаги Қирққиз қалъаси ёдгорлиги, Бойсун тумани Омонхона зиёратгоҳи, Сариосиё тумани Сангардак туризм объектларида "Мусаффо туризм" кўнгиллилар акцияси ўтказилиб, йирик ҳажмдаги ободонлаштириш ишлари олиб борилмоқда. Акция иштирокчилари бу тадбирни ҳар ойнинг биринчи шанбасида ўтказишга келишиб олди.
Тадбир доирасида Термиз археология музейи ва Термиз давлат музей-қўриқхонасида маданий тадбир ҳамда "Очиқ эшиклар куни" ўтказилади. 12-Меҳрибонлик уйи тарбияланувчиларининг Термиз шаҳридаги музейларга саёҳати уюштирилади. Термизликлар ва меҳмонлар Термиз шаҳридаги "Болажон" боғи ва Музсарой оралиғидаги майдонда ҳам қизиқарли тадбирларга гувоҳ бўлади. Ҳунармандлар ва музейлар кўргазмалари ҳам иштирокчиларда бой таассурот қолдиради.
Кечки пайт соҳа вакиллари иштирокида туризм соҳаси фидойиларига фаҳрий ёрлиқ ва эсдалик совғалар топширилади. Иштирокчиларга туризм логотипи туширилган нишон ва байроқлар улашилади.
Шунингдек, туризм саводхонлиги бўйича "Тв викторина" ўтказиш, миллий либослар кўргазмасини ташкил этиш, фольклор этнографик ансамблларнинг қизиқарли концерт дастурларини намойиш этиш режалаштирилган.