Маънавий етук, комил инсонни тарбиялашда музейларнинг ўрни ниҳоятда беқиёс. Зеро, музейларда сақланаётган тарихий ашёлар, нодир қўлёзмалар, ҳужжатлар авлодларга тарихдан, аждодларимиз ҳаёти, юксак маънавиятидан ҳикоя қилади. Бу эса инсон қалбида ота-боболаримиз қолдирган меросга ҳурмат, эъзоз ва муҳаббат туйғусини уйғотиш билан бирга, уларда шу азиз Ватанга муносиб фарзанд бўлиш туйғусини ҳам шакллантиради.

Айни шу жиҳатларни эътиборга олган ҳолда, жорий йилнинг 23 март куни “Маънавият маршурути” доирасида, Сурхондарё вилояти Ички ишлар бошқармаси ва шаҳар-туман ИИБ бошлиқларининг маънавий-маърифий ишлар бўйича ўринбосарлари ҳамда кадрлар билан таъминлаш гуруҳи масъул ходимлари иштирокида “Термиз археология музейига” саёҳат ташкил этилди. Саёҳат давомида соҳа мутахассислари томонидан ходимларга музей тарихи ҳамда музейда мавжуд экспонатлар тўғрисида маьлумотлар берилиб, маънавий-маърифий ишлар бўйича масъул ходимларга келгусида тизимда хизмат олиб бораётган ходимлар учун ҳам бу каби маънавий-маърифий тадбирларни янада кўпроқ ўтказиш бўйича топшириқлар берилди.

Таъкидлаш жоизки, бу каби экскурсияларни доимий равишда ташкиллаштириб бориш тизимда хизмат олиб бораётган ходимларга маънавий озуқа бериш билан бирга, уларда ватанга муҳаббат, аждодларга, тарихимзга бўлган фахр туйғуларини оширишда муҳим аҳамият касб этади.