Ўзбекистон Республикаси Ички ишлар вазирининг “Ички ишлар органларида дастлабки синов муддатини ўташ ва мураббийлик фаолиятини тубдан такомиллаштириш чора-тадбирлари тўғрисида”ги 2023 йил 10 апрель кунидаги тегишли буйруғига мувофиқ, ҳар йили 1 октябрь “Ўқитувчи ва мураббийлар куни” арафасида “Энг яхши мураббий” кўрик-танловининг Республика босқичи ўтказилиши белгиланган.

Шу муносабат билан юқоридаги буйруқ ижросини таъминлаш мақсадида, Сурхондарё вилояти Ички ишлар органларида ҳам жорий йилнинг 24 август куни “Энг яхши мураббий” кўрик танловининг вилоят босқичи ўтказилди. Мазкур танловда бошқарманинг соҳавий хизматлари ҳамда шаҳар-туман ИИБларидан иштирокчи ходимлар қатнашди.

Мазкур танлов низомига кўра ходимлар 4 та шарт асосида: Дастлабки шартда иштирокчиларнинг жисмоний ва жанговар тайёргарликлари синовдан ўтказилди, 2-шартда эса касбий-жанговар билимлари онлайн тест орқали синовдан ўтказилган бўлса, 3-шарт муррабийлар томонидан юритиб борилиши назарда тутилган йиғма жилдлар ҳолати ўрганилди. Танловнинг якуний 4-шартида эса иштирокчиларнинг маънавий-маърифий ҳамда психологик йўналиш бўйича билимлари синовдан ўтказилди.

Танлов якуний натижаларига кўра, Жарқўрғон тумани ИИБ 1-сон Ички ишлар бўлими Ҳуқуқбузарликлар профилактикаси гуруҳи профилактика катта инспектори капитан Рустам Абдуназаров ҳамда шогирди лейтенант Боймурод Мирзаев 3-ўринни, Денов тумани ИИБ 3-сон Ички ишлар бўлими ҳуқуқбузарликлар профилактикаси гуруҳи профилактика катта инспектори подполковник Шухрат Бекмуродов ҳамда шогирди лейтенант Хасан Каранов 2-ўринни қўлга киритган бўлса, Қизириқ тумани Ички ишлар бўлими Жамоат хавфсизлиги хизмати Ҳуқуқбузарликлар профилактикаси бўлинмаси бошлиғи капитан Жасур Искандаров ва шогирди лейтенант Умиджон Йўлдошев 1-ўринни эгаллаб, танловнинг республика босқичида иштирок этиш йўлланмасини қўлга киритди.

Танловнинг ғолиб ва совриндорлари бошқарма раҳбарияти томонидан диплом ҳамда қимматбаҳо эсдалик совғалари билан тақдирланди.