O‘zbekiston Respublikasi Ichki ishlar vazirining “Ichki ishlar organlarida dastlabki sinov muddatini o‘tash va murabbiylik faoliyatini tubdan takomillashtirish chora-tadbirlari to‘g‘risida”gi 2023 yil 10 aprel kunidagi tegishli buyrug‘iga muvofiq, har yili 1 oktabr “O‘qituvchi va murabbiylar kuni” arafasida “Eng yaxshi murabbiy” ko‘rik-tanlovining Respublika bosqichi o‘tkazilishi belgilangan.

Shu munosabat bilan yuqoridagi buyruq ijrosini ta’minlash maqsadida, Surxondaryo viloyati Ichki ishlar organlarida ham joriy yilning 24 avgust kuni “Eng yaxshi murabbiy” ko‘rik tanlovining viloyat bosqichi o‘tkazildi. Mazkur tanlovda boshqarmaning sohaviy xizmatlari hamda shahar-tuman IIBlaridan ishtirokchi xodimlar qatnashdi.

Mazkur tanlov nizomiga ko‘ra xodimlar 4 ta shart asosida: Dastlabki shartda ishtirokchilarning jismoniy va jangovar tayyorgarliklari sinovdan o‘tkazildi, 2-shartda esa kasbiy-jangovar bilimlari onlayn test orqali sinovdan o‘tkazilgan bo‘lsa, 3-shart murrabiylar tomonidan yuritib borilishi nazarda tutilgan yig‘ma jildlar holati o‘rganildi. Tanlovning yakuniy 4-shartida esa ishtirokchilarning ma’naviy-ma’rifiy hamda psixologik yo‘nalish bo‘yicha bilimlari sinovdan o‘tkazildi.

Tanlov yakuniy natijalariga ko‘ra, Jarqo‘rg‘on tumani IIB 1-son Ichki ishlar bo‘limi Huquqbuzarliklar profilaktikasi guruhi profilaktika katta inspektori kapitan Rustam Abdunazarov hamda shogirdi leytenant Boymurod Mirzaev 3-o‘rinni, Denov tumani IIB 3-son Ichki ishlar bo‘limi huquqbuzarliklar profilaktikasi guruhi profilaktika katta inspektori podpolkovnik Shuxrat Bekmurodov hamda shogirdi leytenant Xasan Karanov 2-o‘rinni qo‘lga kiritgan bo‘lsa, Qiziriq tumani Ichki ishlar bo‘limi Jamoat xavfsizligi xizmati Huquqbuzarliklar profilaktikasi bo‘linmasi boshlig‘i kapitan Jasur Iskandarov va shogirdi leytenant Umidjon Yo‘ldoshev 1-o‘rinni egallab, tanlovning respublika bosqichida ishtirok etish yo‘llanmasini qo‘lga kiritdi.

Tanlovning g‘olib va sovrindorlari boshqarma rahbariyati tomonidan diplom hamda qimmatbaho esdalik sovg‘alari bilan taqdirlandi.