2023 йил 2 январ кунидан 3 январ кунига ўтар кечаси тунги соат 01-20 ларда тунги хизматга жалб қилинган Шўрчи туман ИИБ ходимлари туманнинг “Оқтумшуқ” маҳалласи худудидан ўтувчи марказий М41 йўлининг четида шубҳали бўлган ВАЗ русумли автомашина тўхтаб турганлигини кўришади. ИИБ ходимлари ҳайдовчидан автомашинанинг ҳужжатларини сўрашганида, у автомашина ҳужжатлари йўқлигини айтади. Бу ҳолатдан ажабланган ходимлар автомашинада бўлган яна икки нафар фуқаролар билан биргаликда уларнинг шахсига ойдинлик киритиш мақсадида, туман ИИБга олиб келишади.

Холислар иштирокида уларнинг чўнтаклари кўздан кечирилганда, Денов туманида яшовчи 1988 йилда туғилган фуқаро Р.Жамшид (исм-шарифлар ўзгартирилди) кийиб юрган курткаси олд ички қисмидаги чўнтагидан бир дона қора рангли селофан пакетга ўралган малла рангли ўткир хидли “Гашиш” гиёҳвандлик моддасига ўхшаш моддалар борлиги аниқланади. Шу ернинг ўзида холислар иштирокида электрон тарозида ўлчаб кўрилганида, селофан пакети билан бирга 51гр эканлиги аниқланди.

Шундан сўнг фуқаро Р.Жамшиднинг ушбу чўнтагидан олинган оқ рангли селофан пакет ичида бўлган малла рангли ўткир ҳидли “Опий” гиёҳвандлик моддасига ўхшаш моддалар борлиги, унинг миқдори эса ўралган селофан пакети билан биргаликда 102гр эканлиги маълум бўлди. Кўздан кечириш давомида, унинг кийиб юрган шимининг чўнтагида 2.050.000 (икки миллион эллик минг) сўм хар ҳил купюрали пуллар ҳам борлиги аниқланди.

Шундан сўнг ушбу автомашинада бўлган Денов туманида яшовчи 1996 йилда туғилган Х.Равшаннинг чўнтаклари кўздан кечирилганда 590.000 (беш юз тўқсон минг) сўм пуллар борлиги аниқланиб, холислар иштирокида тегишли тартибда ҳужжатлаштириб олинди.

Текширув давомида ушбу автомашинада бўлган учинчи шахс, Денов туманида яшовчи 1994 йилда туғилган Ж.Холматнинг чўнтаклари кўздан кечирилганда унинг чўнтагидан 9.960.000 (тўққиз миллион тўққиз юз олтмиш минг) сўм пуллар борлиги аниқланиб холислар иштирокида қонуний тартибда хужжатлаштириб олинди.

Сурхондарё вилояти ИИБ Ахборот хизмати.