Жорий йилнинг 3 август куни Сурхондарё вилояти Ички ишлар бошқармаси бошлиғи ўринбосари, подполковник Иқболиддин Кетмонов, Олтинсой туман ИИБ бошлиғи, подполковник Одилжон Жиянов Олтинсой туманининг 3-сектор ҳудудидаги “Ипоқ” маҳалла фуқаролар йиғинида аҳоли билан сайёр қабул ўтказди.

Сайёр қабул давомида туманнинг “Ипоқ” маҳалласида яшовчи Нигора Замонова касби тикувчи эканлиги, тикув машинасига эҳтиёжи борлиги хусусида мурожаат этди. Мурожаатчининг муаммоси сектор раҳбари томонидан ҳал қилинадиган бўлди. Шунингдек, сайёр қабулда туманнинг 3-секторга қарашли “Паҳлавон” маҳалласида яшовчи фуқаро Бозор Омонқулов “Денов-Паҳлавон” йўналишида қатнайдиган автобус йўналишини йўлга қўйиш, Тоғай Мурод номли маҳалла фуқароси Шамсиддин Абдурайимов қишлоқ аҳолиси эҳтиёжи учун зарур трансформатор билан таъминлаш, Дуғоба МФЙ фуқароси Акром Примқулов симёғочлар эскириб қолганлиги сабабли уларни янгисига алмаштириш, Жобу-1 маҳалласидан Гулбаҳор Ражабова қишлоқда ичимлик суви йўқлиги, “Ипоқ” МФЙ фуқароси Соҳибназар Оллоқулов қизи Ҳулкарни боғчада кўп йилдан буён ярим штатда ишлаб келаётганлиги сабабли тўлиқ штат ажратилиши масаласида мурожаат қилишди ва ўзларини қийнаб келаётган муаммоларни ҳал қилишда кўмак сўрашди. Фуқароларнинг турли масалалар юзасидан қилган мурожаатлари Сурхондарё вилояти 3-сектор аъзолари, ҳамда Олтинсой туман мутасадди идоралари, сектор раҳбарлари иштирокида бирма-бир кўриб чиқилди.

Қабул давомида 5 нафар фуқароларга ID карталари топширилди, “Ипоқ” маҳалласида яшовчи кўмакка муҳтож фуқаро Ғайрат Алиқуловга ҳомийлик ёрдами сифатида 600 минг сўм, шу маҳаллалик Зуҳра Ибрагимовага кредит тўлови учун ёрдам тариқасида бир миллион сўм кредит қарздорлиги тўлаб берилди. Кўриб чиқилган 19 та мурожаатларнинг аксарияти жойида ижобий ҳал этилиб, қўшимча ўрганишни талаб қилганлари юзасидан қонунда белгиланган тартибда тушунтириш берилиб, ижроси юзасидан мутасаддиларга манзилли кўрсатмалар берилди.

Сайёр қабулда Олтинсой тумани ҳокимининг биринчи ўринбосари И.Бабакулов, ҳоким ўринбосарлари Х.Қосимов, М.Хидировалар қатнашди.