Ўзбекистон Республикаси Ички ишлар вазирининг 2021 йил 31 март кунидаги “Ички ишлар органлари тизимида “Заковат” интеллектуал ўйинларини ташкил этиш тўғрисида”ги тегишли буйруғи ҳамда 2022 йил 7 сентябрдаги Ички ишлар органлари тизимида “Касбий тайёргарлик ойлиги”ни ўтказиш тўғрисидаги Фармойиши ижросини таъминлаш мақсадида, жорий йилнинг 17 сентябрь куни Сурхондарё вилояти Матбуот уйи биносида вилоят ички ишлар органлари ходимлари ўртасида “Заковат” интеллектуал ўйинлари ўтказилди.

Унда вилоят ички ишлар бошқармаси, шаҳар, туман ички ишлар органлари ходимлари ҳамда Ички ишлар вазирлиги Сурхондарё Академик лицейидан тузилган жами 19 та жамоа иштирок этиб, мазкур жамоалар иштирокидаги баҳслар муросасиз беллашувларга бой тарзда бўлиб ўтди.

Беллашувлар натижасига кўра фахрли 3-ўринни Термиз тумани ИИБ жамоаси, фахрли 2-ўринни Сариосиё тумани ИИБ жамоаси ҳамда 1-ўринни Ангор тумани ИИБ жамоаси қўлга киритди.     

Мусобақанинг ғолиб ва совриндорлари бошқарма бошлиғининг диплом, қимматбаҳо эсдалик совғалари ҳамда китоблар жамланмаси билан тақдирландилар.

Бу каби интеллектуал ўйинларнинг ташкил этилиши ички ишлар органлари ходимларининг билим ва салоҳиятини интеллектуал қобиляти шунингдек ҳозиржавоблигини оширишга хизмат қилиши билан бирга ходимларнинг ўз устида ишлашлари, китоб ўқишга бўлган қизиқишларини ҳамда маънавиятини юксалтиришга хизмат қилади.