“Янги йил” байрам муносабати билан Сурхондарё вилояти ИИБ ходимлари фарзандлари учун “Қорбобони ўғирлашди» номли спектакл намойиш этилди
Саноқли кунлардан сўнг 2022 йил билан хайрлашиб, байрамона кайфият билан янги 2023 йилни қарши оламиз. Ҳар йилгидек, яхши тилаклар, эзгу ниятлар билан янги йил байрамини нишонлаб келамиз.
Худди шундай тадбирлардан бири жорий йилнинг 29 декабрь куни Сурхондарё вилояти Ички ишлар органлари ходимлари, ҳарбий ва ишчи хизматчилари ҳамда хизмат вазифасини бажариш чоғида ҳалок бўлган ходимларнинг оила аъзолари ва фарзандларига ана шундай байрамона кайфият улашиш мақсадида Термиз шаҳрида жойлашган Санъат саройида байрам тадбири ташкил этилди.
Байрам тадбирида Сурхондарё вилояти мусиқали драма театрининг ижодий жамоаси томонидан саҳналаштирилган «Қорбобони ўғирлашди» номли спектакли намойиш этилди.
Ушбу спектакль ички ишлар органлари ходимлари, ҳарбий хизматчилари ҳамда хизмат вазифасини бажариш вақтида ҳалок бўлган ходимларнинг оила аъзолари ва фарзандларига олам-олам қувонч ва завқ бағишлади. Шунингдек, тадбир давомида болажонларга Қорбобо ва Қор қиз томонидан янги йил байрам совғалари улашилди.
Бундан ташқари Сурхондарё вилояти ИИБ раҳбарияти хизмат вазифасини бажариш вақтида ҳалок бўлган ходимларнинг хонадонларига ҳам ташриф буюриб, оила аъзоларининг муаммолари ўрганилди. Ташриф давомида, хонадон ўғил-қизларига янги йил совғалари топширилиб, уларнинг ўксик қалбларига қувонч улашилди.
Сурхондарё вилояти ИИБ Ахборот хизмати
