“Yangi yil” bayram munosabati bilan Surxondaryo viloyati IIB xodimlari farzandlari uchun “Qorboboni o‘g‘irlashdi» nomli spektakl namoyish etildi
Sanoqli kunlardan so‘ng 2022 yil bilan xayrlashib, bayramona kayfiyat bilan yangi 2023 yilni qarshi olamiz. Har yilgidek, yaxshi tilaklar, ezgu niyatlar bilan yangi yil bayramini nishonlab kelamiz.
Xuddi shunday tadbirlardan biri joriy yilning 29 dekabr kuni Surxondaryo viloyati Ichki ishlar organlari xodimlari, harbiy va ishchi xizmatchilari hamda xizmat vazifasini bajarish chog‘ida halok bo‘lgan xodimlarning oila a’zolari va farzandlariga ana shunday bayramona kayfiyat ulashish maqsadida Termiz shahrida joylashgan San’at saroyida bayram tadbiri tashkil etildi.
Bayram tadbirida Surxondaryo viloyati musiqali drama teatrining ijodiy jamoasi tomonidan sahnalashtirilgan «Qorboboni o‘g‘irlashdi» nomli spektakli namoyish etildi.
Ushbu spektakl ichki ishlar organlari xodimlari, harbiy xizmatchilari hamda xizmat vazifasini bajarish vaqtida halok bo‘lgan xodimlarning oila a’zolari va farzandlariga olam-olam quvonch va zavq bag‘ishladi. Shuningdek, tadbir davomida bolajonlarga Qorbobo va Qor qiz tomonidan yangi yil bayram sovg‘alari ulashildi.
Bundan tashqari Surxondaryo viloyati IIB rahbariyati xizmat vazifasini bajarish vaqtida halok bo‘lgan xodimlarning xonadonlariga ham tashrif buyurib, oila a’zolarining muammolari o‘rganildi. Tashrif davomida, xonadon o‘g‘il-qizlariga yangi yil sovg‘alari topshirilib, ularning o‘ksik qalblariga quvonch ulashildi.
Surxondaryo viloyati IIB Axborot xizmati
