ИИВ Сурхондарё Академик лицейида "Ассалом, Наврўз, янгиланиш, меҳр оқибат ва қадр-қиммат айёми" шиори остида байрам тадбири бўлиб ўтди
Жорий йилда ҳам Наврўз байрами юртимизнинг барча гўшаларида катта тантана билан нишонланмоқда. Шунингдек, ИИВ Сурхондарё академик лицейида ҳам янгиланиш, яшариш айёми бўлмиш 21-март Наврўз умумхалқ байрами муносабати билан "Ассалом, Наврўз, янгиланиш, меҳр оқибат ва қадр-қиммат айёми" шиори остида тадбир бўлиб ўтди. Тадбирни академик лицейи директори подполковник Б.В.Бўриев очиб берди ва байрам билан барчани қутлади. Тадбир давомида миллий анъаналаримиз жумладан, келин салом, баҳорий рақслар ҳамда Ватанни мадҳ этувчи қўшиқлар ўқувчиларимиз томонидан ижро этилди. Шунингдек, ўқувчилар томонидан тарихий қадрият ва анъаналаримизни акс эттирувчи кўргазмалар ҳамда тарихий халқ урф-одатларига айланган миллий ўйинлар ҳамда спорт чиқишлари ҳам намойиш этилиб, унда ўқувчилар ўзларининг маҳорат ва кучларини синашдилар. Тадбирда ғолиб бўлган гуруҳлар академик лицей маъмурияти томонидан фахрий ёрлиқ ва китоблар билан тақдирланишди.
Сурхондарё вилояти ИИБ Ахборот хизмати
