Сурхондарё вилояти Ички ишлар бошқармаси бошлиғи томонидан 2024 йил 15 феврал кунида тасдиқланган режа дастур асосида, Сурхондарё вилояти ички ишлар органларида маънавий-маърифий ишларни ташкил этиш, шахсий таркиб ўртасида хизмат интизоми ва қонунийликни мустаҳкамлаш, келгусида ходимлар томонидан содир этилиши мумкин бўлган қонунбузилиш ҳолатларини олдини олиш мақсадида, бугун Шеробод туманидаги Маданият уйи биносида вилоят ички ишлар бошқармаси Маънавий-маърифий ишлар ва кадрлар билан таъминлаш хизмати ва Ички ишлар вазирлиги Шахсий хавфсизлик бош бошқармаси Сурхондарё вилояти бўйича бошқармаси масъуллари билан ҳамкорликда жорий йилнинг              20 феврал куни Шеробод тумани ИИБда хизмат олиб бораётган ходимлар ҳамда уларнинг оила аъзолари иштирокида учрашув ташкил этилди.

Учрашув аввалида, вилоят ички ишлар бошқармаси бошлиғи ўринбосари подполковник Шадиев Шерзод Файзуллаевич сўзга чиқиб, бугунги кунда ички ишлар органлари ходимларининг ҳарбий-ватанпарварлик туйғусини, маънавий савиясини ва интеллектуал салоҳиятини юксалтиришни таъминлаш, уларда мамлакатимизнинг қадимий ва бой маданияти, азалий қадриятлари, удумлари ва анъаналарига асосланган кенг дунёқарашини янада  шакллантириш юзасидан бир қатор манзилли ишлар амалга ошириб келинаётганлигини, аммо баъзи бир ходимлар ушбу яратилаётган шарт-шароитлардан унумли фойдаланмасдан ҳозирги кунда хизмат интизоми ва қонунчиликка риоя этмасдан жавобгарликка тортилиб кетаётганлигини қайд этди.

Шунингдек, келгусида ходимларимиз жонажон Ўзбекистонимизда ҳукм сураётган тинчлик-осойишталик, миллатлараро тотувлик, бағрикенглик муҳитини кўз қорачиғидек асраб-авайлаш, бундай бебаҳо бойликни муттасил мазмунан бойитиб бориш, Ўзбекистон тараққиёти йўлида бир муштга жипслашиб, давлатимиз раҳбарига таянч ва суянч бўлиб хизмат қилиш, келгуси авлодларни шу руҳда камол топтириш муқаддас бурч эканлигини таъкидлаб ўтди.

Учрашув давомида 2023 йил давомида вилоят ички ишлар органлари ходимлари томонидан содир этилган салбий ҳамда ижобий ҳолатлар асосида тайёрланган видеофилм ходимларнинг келгуси хизмат фаолиятларида ўзларига тегишлича тўғри хулоса чиқаришлари учун йиғилганларнинг эътиборига намойиш этилди.

Намойиш этилган филм якунида Ички ишлар вазирлиги Шахсий хавфсизлик бош бошқармаси Сурхондарё вилояти бўйича бошқармаси бошлиғи подполковник Самандаров Қудрат Базарбаевич, Шеробод тумани ички ишлар бўлими Фахрийлар кенгаши раиси истефодаги подполковник Шаймурадов Искандар Ибрагимовичлар сўзга чиқишиб, намойиш этилган ушбу видеофилмдан ҳар бир ходим ўзига тегишлича хулоса чиқариб олишлари, тўғрсида таъкидлаб ўз фикр мулоҳазаларини учрашув иштирокчиларига билдириб ўтишди.

Тадбир сўнгида хизмат фаолияти давомида ижобий натижаларга эришиб ҳамкасбларига ўрнак бўлиб келаётган бир гуруҳ ходимларнинг ота-оналарига вилоят ички ишлар бошқармаси бошлиғининг ташаккурномалари ҳамда эсдалик совғалари тантанали равишда топширилди.