Бугун Сурхондарё вилояти Ички ишлар бошқармасининг ёпиқ услубдаги замонавий спорт мажмуасини фойдаланишга топширишга бағишланган тантанали маросим бўлиб ўтди.

Унда давлат ва жамоат ташкилотлари, Жанубий оператив қўмондонлиги, прокуратура ва бошқа ҳуқуқни муҳофаза қилувчи идоралар раҳбарлари, фахрийлар, ички ишлар органлари ходимлари иштирок этди.

Тадбир қатнашчилари Термиз гарнизони ҳарбий оркестри ижросидаги тантанавор маршлар билан кутиб олинди.

Президентимизнинг 2019 йил 17-18 октябрь кунлари Сурхондарё вилоятига ташрифи чоғида берган топшириқлари ижроси доирасида бунёд этилган йирик мажмуани қуриб, фойдаланишга топшириш учун Ички ишлар вазирлигининг бюджетдан ташқари маблағи ҳисобидан 6 миллиард 817 миллион сўм сарфланди.

Тантанали маросим аввалида вилоят ҳокими Тўра Боболов тадбир қатнашчиларини 25 октябрь–Ички ишлар органлари ходимлари куни билан самимий табриклаб, сўнгги йилларда мамлакатимизда соҳага қаратилаётган эътибор ҳақида атрофлича сўз юритди. Замонавий усулда бунёд этилган икки қаватли янги спорт мажмуаси ҳам ички ишлар органлари ходимларига кўрсатилаётган ғамхўрликларнинг ёрқин ифодаси эканини таъкидлади.

Сурхондарё вилояти Ички ишлар бошқармаси бошлиғи, полковник Исмоилов Абдувохид Саломович соҳа ходимларини касб байрамлари ва янгидан барпо этилган спорт мажмуасининг фойдаланишга топширилиши билан муборакбод этиб, ички ишлар органлари ходимларининг тинч, фаровон ҳаётни таъминлаш йўлида олиб бораётган машаққатли хизматлари ва спортда эришаётган ютуқлари ҳақида сўз юритди. Бинони сифатли барпо этган қурувчи Салоҳиддин Пардаевга миннатдорлик рамзи сифатида ўзбекона тўн ёпди.

Вилоят ИИБ фахрийлар кенгаши раиси, истеъфодаги подполковник Акрам Шарофутдинов Янги Ўзбекистонда осайишталик посбонларининг ўз хизмат бурчини шараф билан адо этиши ва жисмонан чиниқиб, саломатлигини мустаҳкамлаши учун яратилаётган бундай қулайликлар мамлакатимизни ҳар тарафлама ривожлантириш ҳамда аҳолининг осуда турмушини таъминлашда муҳим ўрин тутишига эътибор қаратди. Ходимларга тегишли маслаҳат ва тавсияларини билдирди.

Бино қурувчиси рамзий калитни вилоят ИИБ бошлиғи ўринбосари, подполковник Шерзод Шадиевга тантанали топширди.

Алвон тасма кесилгач, тадбир қатнашчилари вилоят ҳокими бошчилигида спорт мажмуасини кўздан кечирди. Вилоят Ички ишлар органларида хизмат қилиб келаётган, спортнинг турли йўналишларида Ўзбекистон, Осиё, Жаҳон чемпиони, деган юксак шарафга муяссар бўлган ходимларнинг эришган ютуқлари билан танишди. 25 октябрь –Ички ишлар органлари ходимлари куни муносабати билан спортнинг “Мини футбол” тури бўйича ўтказилган мусобақа ғолиб ва совриндорларини тақдирлаш маросими ўтказилади.

Тадбир якунида вилоят Ички ишлар бошқармаси Тезкор вазифаларни бажариш сафарбар отряди ходимларининг кўргазмали чиқишлари намойиш этилди.

Сурхондарё вилояти ИИБ ахборот хизмати