Kuni kecha viloyat Matbuot uyi binosida, Surxondaryo viloyati IIB Migratsiya va fuqarolikni rasmiylashtirish boshqarmasi, O‘zbekiston Respublikasi Davlat xavfsizlik xizmatining Surxondaryo viloyati bo‘yicha boshqarmasi hamda Surxondaryo viloyat Turizm va Madaniy Me’ros bosh boshqarmasi xodimlari ishtirokida viloyat hududida faoliyat yuritib kelayotgan joylashtirish vositalari (mehmonxonalar, spa-mehmonxonalar, motellar, dam olish uylari va oilaviy mehmon uylari va boshqa ob’ektlar) mutasaddi rahbarlari, Ommaviy axborot vositalari vakillari, blogerlar ishtirokida Matbuot anjumani tashkil etildi.

O‘tkazilgan Matbuot anjumanida O‘zbekiston Respublikasi Vazirlar Mahkamasining 2020 yil 28 sentabr kunidagi “O‘zbekiston Respublikasida chet el fuqarolari va fuqaroligi bo‘lmagan shaxslarni ro‘yxatga olish tartibini soddalashtirish chora-tadbirlari to‘g‘risida”gi Qarori mazmun-mohiyati haqida so‘z yuritildi.

Mazkur Qaror talablariga ko‘ra joylashtirish vositalari “Ye-mehmon” elektron dasturi orqali tashrif buyurayotgan shaxslarni belgilangan tartibda qabul qilish va vaqtinchalik ro‘yxatga olish shuningdek, ularning respublika hududida harakatlanish tartibi, kelgusida ularga tegishli shart-sharoitlar yaratish yuzasidan tushuntirish va targ‘ibot ishlari olib borildi.

Tadbir yakunida, ishtirokchilar hamda ommaviy axborot vositalari vakillari o‘zlarini qiziqtirgan savollariga mutaxassislar tomonidan javoblar olishdi.