So‘nggi yillarda, ichki ishlar organlari uchun mutaxassislar tayyorlashning mutlaqo yangi tizimini joriy etish, xodimlarning malakasiga qarab xizmat bo‘yicha o‘sishni ta’minlash, shuningdek, kuch va vositalarni samarali boshqarishda rahbar kadrlarning intellektual va professional salohiyatini yanada oshirish maqsadida ichki ishlar organlari uchun professional kadrlarni tayyorlashning sifat jihatidan yangi tizimini joriy etish bo‘yicha chora-tadbirlar to‘g‘risida qarorlari qabul qilindi.

O‘zbekiston Respublikasi Ichki ishlar vazirligining tegishli buyrug‘i hamda ko‘rsatmasi talablariga muvofiq, Surxondaryo viloyati ichki ishlar organlarining ofitserlik va safdorlik lavozimlariga tanlov asosida xizmatga qabul qilingan xodimlar bilan Janubiy-operativ qo‘mondonligi tasarrufiga kiruvchi 11506-sonli harbiy qism o‘quv bazasida 2023-yilning 11-dekabr kunidan 2024-yilning 10-yanvar kuniga qadar boshlang‘ich kasbiy tayyorgarlik o‘quv mashg‘ulotlari o‘tkazildi.

O‘tkazilgan o‘quv mashg‘ulotlari davomida xodimlarning nafaqat nazariy balki amaliy ko‘nikmalari ham oshirildi.

O‘quv yig‘inlarini samarali tashkil etish maqsadida, sohaviy xizmatlar, boy amaliy tajriba va yuqori malakaga ega ilmiy-pedagog xodimlar hamda mutaxassislar shuningdek, harbiy qismning malakali harbiy xizmatchilari jalb etildi.

2024-yilning 10-yanvar kuni Vazirlik Malaka oshirish instituti hamda viloyat Ichki ishlar boshqarmasining mas’ul xodimlari tomonidan ofitserlik va safdorlik lavozimlariga tanlov asosida xizmatga qabul qilingan xodimlardan yakuniy sinov imtihonlari qabul qilindi. Dastlab, xodimlarning saf tayyorgarligi bo‘yicha, so‘ng jangovar, kasbiy va yuridik tayyorgarlik bo‘yicha bilimlari baholandi.

Mazkur imtihonlardan muvaffaqiyatli o‘tgan xodimlarga belgilangan namunadagi sertifikatlar tantanali ravishda topshirildi.