O‘zbekiston Respublikasi Ichki ishlar vazirining o‘rinbosari, general-mayor Davron Nazarmuxamedov Termiz davlat muhandislik va agrotexnologiyalar universitetida Surxondaryo viloyatidagi ichki ishlar  faxriylari bilan ochiq muloqot tarzida uchrashuv o‘tkazdi.

O‘tkazilgan muloqotda Surxondaryo viloyati Ichki ishlar boshqarmasi boshlig‘i polkovnik Timur Ismailov, viloyat ichki ishlar boshqarmasining ma’naviy-ma’rifiy ishlar va kadrlar bilan ta’minlash xizmati, hududiy ichki ishlar boshqarma va bo‘limlari boshliqlarining ma’naviy-ma’rifiy ishlar bo‘yicha o‘rinbosarlari ham ishtirok etgan yig‘ilishda vazir o‘rinbosari mamlakatimizda keksalarga, jumladan, soha faxriylariga ko‘rsatilayotgan e’tibor va g‘amxo‘rliklar haqida so‘z yuritdi.

Chunonchi, oktabr oyining boshida uyushtirilgan “Keksalar haftaligi” doirasida amalga oshirilgan ishlar hamda noyabr — keksalar uchun turizm oyida davomida amalga oshiriladigan ishlar bilan tanishtirib o‘tdi.

Xuddi shunday, Toshkent shahri, Qoraqalpog‘iston Respublikasi va viloyatlar ichki ishlar organlari faxriylar kengashlarining faoliyati, xususan, joriy qilingan ilg‘or tajribalar yuzasidan fikr almashildi.

O‘z navbatida Surxondaryo  viloyati ichki ishlar boshqarmasi faxriylar kengashi mas’ullarining joriy yilning o‘tgan davriga oid hisoboti tinglandi. Shundan so‘ng faxriylarning talab va takliflari eshitildi.

Ushbu jarayonda faxriylarni ijtimoiy qo‘llab-quvvatlash, Surxondaryo  viloyati ichki ishlar boshqarmasi tibbiyot bo‘limi faoliyatini yanada yaxshilash, ajratiladigan dori-darmonlar miqdori va sanatoriylarga yo‘llanmalarni ko‘paytirish kabi bir qator masalalar ko‘tarildi.

Shuningdek, ustoz va shogird an’anasini kuchaytirish, faxriylarning hayotiy tajribasi va bilimlaridan ichki ishlar organlari va mahalla fuqarolar yig‘inlari faoliyatida keng foydalanish, keksalar o‘rtasida ma’naviy-ma’rifiy tadbirlar uyushtirish, ularni qo‘llab-quvvatlash maqsadida jamg‘arma tashkil qilish bo‘yicha takliflar bildirildi.

Respublikada uch avlod maslahat kengashi yo‘lga qo‘yilganligi, Xorazm, Farg‘ona va Namangan viloyatlarida faxriylar uchun amaliy ishlardan namuna olish, viloyatda faxriylar kengashining surxondaryo tajribasini ishlab chiqish va amaliyotga joriy etish taklifi berildi.

Tadbirda ishtirok etayotgan faxriylarning “Xotira muqaddas” shiori ostida xizmat vaqtida mardlarcha halok bo‘lgan ichki ishlar  organlari xodimlarining xotirasini abadiylashtirish maqsadiga qaratilgan tadbirini o‘tkazish taklifi berilib surxondaryo tajribasi sifatida joriy etilishi belgilab olindi.

Ma’lumot o‘rnida aytish kerak, Ichki ishlar vazirining o‘rinbosari, general-mayor Davron Nazarmuxamedov tomonidan bunday muloqotlarni respublikamizning barcha hududlarida o‘tkazib kelmoqda.

Surxondaryo viloyati IIB Axborotxizmati.