O‘zbekiston Respublikasi IIVning 2024 yil 10 may kunidagi tegishli farmoyishiga asosan, joriy yilning 1 iyun kunidan 30 iyun kuniga qadar ichki ishlar organlarida “Intizom oyligi” deb e’lon qilinganligi va O‘zbekiston Respublikasi Prezidentining “Nuroniylarni har tomonlama qo‘llab-quvvatlash, ularning turmush darajasini oshirishga doir qo‘shimcha chora-tadbirlar to‘g‘risida”gi 2022 yil 15 mart kunidagi PQ-167-son Qarori ijrosini ta’minlash maqsadida, joriy yilning 11 iyun kuni, viloyat IIB rahbariyati, viloyat IIB Faxriylar kengashi, Uzun tumani IIB Faxriylari va tuman IIBda xizmat olib borayotgan xodimlar ishtirokida Uzun tumani IIB Faxriylar kengashining hisobot-saylov yig‘ilishi va “Uch avlod” uchrashuvi bo‘lib o‘tdi.

Yig‘ilish avvalida boshqarma Ma’naviy-ma’rifiy ishlar va kadrlar bilan ta’minlash xizmati boshlig‘i o‘rinbosari Husan Nurmatov so‘zga chiqib, bugungi kunda muhtaram Prezidentimiz, Ichki ishlar vazirligi hamda viloyat IIB tomonidan Faxriylarga yaratilayotgan shart-sharoitlar haqida to‘xtalib, bugungi kunda Faxriy xodimlar bilan ishlash tizimi yangi bosqichga ko‘tarilayotganligini alohida ta’kidlab, ichki ishlar vaziri o‘rinbosari general-mayor D.A.Nazarmuhamedov tomonidan tizimda xizmat olib borayotgan faxriy ustozlarga yo‘llagan ko‘rsatmasini o‘qib eshittirib, yig‘ilishga ishtirok etgan faxriy ustozlarning muammo va takliflarini o‘rganib, mas’ul rahbarlarga ushbu murojaatlarni ijobiy hal etish bo‘yicha vazifalar yuklash bilan birga, hozirgi kunda Ichki ishlar organlarida “Intizom oyligi” deb e’lon qilinganligi munosabati bilan har bir xodim ushbu oylikda faol ishtirok etishlari, tuman IIBda xizmat olib borayotgan xodimlarga xizmat intizomiga qat’iy amal qilishlari haqida topshiriqlar berdi.

Yig‘ilish davomida Uzun tumani IIB Faxriylar kengashi raisi lavozimiga nomzod ko‘rsatilib, yig‘ilish qatnashchilari tomonidan nomzod bir ovozdan ma’qullandi.

Shuningdek, ushbu tadbir davomiyligini “Uch avlod” uchrashuvi tashkil etdi. Uchrashuvda faxriy ustozlar so‘zga chiqishib, tuman IIBda xizmat olib borayotgan yosh xodimlarga xizmat intizomiga qat’iy rioya etishlari, fuqarolar bilan hushmuomala bo‘lishlari qolaversa har bir murojaatga mas’uliyat bilan yondoshib, vaziyatni to‘g‘ri baholagan holda  xizmat olib borishlari yuzasidan maslahatlarini berishdi.

Yig‘ilish so‘ngida, tuman IIBning bir qator faol faxriylariga viloyat IIB boshlig‘ining Faxriy yorliqlari va esdalik sovg‘alari tantanali ravishda topshirildi.