Bugungi kunda dunyo ahlini tashvishga solayotgan global muammolardan biri ekologiyaning buzilishidir. Shu boisdan O‘zbekiston Respublikasida ham ekologik vaziyatni yaxshilash, bu orqali iflos gaz va havolarni tozalash, aholining salomatligini yaxshilash maqsadiga qaratilgan “Yashil makon” umummilliy loyihasi doirasida mamlakatimiz bo‘ylab qator, chora-tadbirlar amalga oshirilmoqda.

Ushbu loyihalar doirasida, Surxondaryo viloyatida ham manzarali, mevali daraxt va buta nihollarini ekish orqali iqlim sharoitlarini yaxshilash borasida samarali ishlar yo‘lga qo‘yilgan.

Surxondaryo viloyati 3-sektor hududiga qarashli Termiz tumanining “Ayritom” mahallasi hududida yovvoyi o‘t-o‘lanlar bosib changalzorga aylangan qarovsiz bo‘lgan qariyb 6 gektar yer maydoni viloyat ichki ishlar boshqarmasining sohaviy xizmat xodimlariga taqsimlanib berilishishi natijasida, ushbu tashlandiq yer tez fursatlarda yovvoyi o‘t-o‘lanlardan tozalanib, og‘ir va qishloq xo‘jaligi texnikalari yordamida kerakli ishlovlar berilishi natijasida, “Surxondaryo viloyati Ichki ishlar boshqarmasining mevali daraxtlar bog‘i” barpo etilgan edi.

Ushbu bog‘da 5 turdagi mevali daraxt nihollari bog‘dorchilikka ilmiy yondoshilgan holda 1000 tup olma, 500 tup olxo‘ri, 500 tup shaftoli, mahalliy yong‘oq-400 tup, 620 tup o‘rik nihollari hamda 1000 tupdan ortiq manzarali archa ko‘chatlar ekilgan.

Mazkur barpo etilgan bog‘da bugun ichki ishlar organlari xodimlarining jonkuyarligi va hamjihatligi bois bog‘ atrofi turli chiqindilardan tozalanib, daraxt ko‘chatlari va oralariga qishloq xo‘jaligi texnikalari hamda xodimlarning qo‘l kuchi yordamida ishlov berilmoqda.

Ekilgan ko‘chatlar oralariga turli qishloq xo‘jaligi mahsulotlari, sabzavot va ko‘katlar ekish rejalashtirildi.    

Yurtimizda amalga oshirilayotgan “Yashil makon” umummilliy loyihasi ezgu qadriyatlarimiz davomiyligini ta’minlash va barqaror rivojlanishga erishishda muhim omil bo‘lmoqda.

Ushbu dastur doirasida hashar tadbirlari vohamizning barcha hududiy ichki ishlar bo‘linmalari xodimlari tomonidan 1 dekabrga qadar amalga oshiriladi.