O‘zbekiston Respublikasi Prezidentining “Axborot texnologiyalari yordamida sodir etiladigan jinoyatlarga qarshi kurashish faoliyatini yanada kuchaytirishga qaratilgan  chora-tadbirlar to‘g‘risida” 2025 yil 30-apreldagi PQ-153-son qarori ijrosini ta’minlash, aholini kibermakondagi tahdidlardan himoya qilish, ularni kiberjinoyatlarning oqibatlaridan ogohlantirishga qartilgan targ‘ibot-tashviqot ishlarini yanada samarali olib borish maqsadida kompleks profilaktik tadbirlar o‘tkazilib kelinmoqda.

Huddi shunday targ‘ibot tadbirlaridan biri bugun Termiz iqtisodiyot va servis universitetida Termiz shahar prokuraturasi hamda Surxondaryo viloyati ichki ishlar boshqarmasi hamkorligida “Xavfsiz kiber makon” mavzusida o‘tkazildi.

Ushbu tadbir davomida, dastlab Termiz shahar prokurori o‘rinbosari Komil Hazratqulov so‘zga chiqib yoshlar o‘rtasida sodir etilayotgan turli huquqbuzarlik holatlari va jinoyatchiliklar to‘g‘risida ma’ruza qildi. Bugungi kunda, viloyatimiz hududida sodir etilayotgan jami jinoyatlar orasida internet makonidagi hamda kompyuter texnologiyalari sohasi bilan bog‘liq jinoyatlar nisbati keskin oshib borayotganligi ta’kidlandi.

Shundan so‘ng, viloyat IIB Axborot texnologiyalari sohasidagi jinoyatlarga qarshi kurashish boshqarmasi xodimi tomonidan kiber jinoyat turlari, ularning turli ko‘rinishgi sodir etilishi hamda oqibatlari to‘g‘risida ma’lumotlar keltirilib, uchrashuv ishtirokchilarini ogohlikka chaqirdi.

Tadbirda ishtirok etayotgan talabalar hamda professor-o‘qituvchilarga videolavhalar namoyish etildi. viloyat IIB Axborot texnologiyalari sohasidagi jinoyatlarga qarshi kurashish boshqarmasi xodimlari tomonidan tarqatma materiallar ulashildi.

Uchrashuv davomida, talabalar o‘zlarini qiziqtirgan savollariga javoblar olishdi.

Tadbir so‘ngida fakultet dekani Bekzod Babamuratov hamda universitet profilaktika inspektori Sherzod Allayarovlar so‘z olib, ushbu jinoyatlarning oldini olish uchun talabalardan ogoh bo‘lishlari qolaversa tadbir davomida olgan ma’lumotlarini tengdoshlariga faol targ‘ibot qilishlariga chorlab o‘tishdi.