Inson uchun tinchlik bebaho ne’matdir. Osoyishtaligini yo‘qotgan xonadon ham, mamlakat ham aslo xotirjam bo‘la olmaydi. Shundanmi o‘zbek xalqi azal-azaldan tinchliksevarlik targ‘ibiga bag‘ishlangan buyuk milliy ma’naviy merosga ega. 9 may sanasini Xotira va Qadrlash kuni tarzida umumxalq bayrami sifatida nishonlab kelayotganimiz zamirida ham aynan ana shu ezgu maqsad yotadi. Termiz shahridagi Xotira maydonida ham bugungi nurafshon xotirjamlikni bizga baxshida etgan ajdodlarimiz yodga olindi.

Viloyat xokimligi, viloyat Ichki ishlar boshqarmasi va huquqtartibot organlari, viloyat IIB faxriylari hamda vatan himoyachilari jam bo‘lgan maydon uzra harbiy orkestr tomonidan g‘alaba va xotira kuylari sadosi ostida Motamsaro ona haykali poyiga gulchambarlar qo‘yildi. Garchi qaddi bukilgan bo‘lsada, bugungi yorug‘ kunlardan, tinchlik va osoyishtalikdan, atrofi gulchambarlarga to‘lib, go‘yoki parishon onaning huzuri bayramona ko‘rinish oldi.

Tadbirda Vatan uchun jon fido qilgan himoyachilar xotirasi yodga olinib, oramizdagi fidoyi insonlarning, tinchlikning qadriga yetish, urushni qoralash, tinch-osoyishta yashayotganimiz, turmush farovonligini ta’minlash uchun kechani kecha kunduzni kundu, sovuqni-sovuq, issiqni-issiq demay ter to‘kib, unumli mehnat qilayotganimizning shukronasi keltirildi.

“Vatanparvarlik” bog‘ida urush yillarida foydalanilgan harbiy texnikalar, qurol aslahalar bilan tanishish asnosini beruvchi ko‘rgazmali “front maydoni”ni eslatuvchi jonli sahna yasatilgan. Ushbu hududga tashrif buyurganlar urush yillari gavdalangan manzaraning guvohi bo‘lishib, qurol aslahalar, kuch ishlatar tuzilmalarning sahnalashtirilgan chiqishlarini tomosha qilishdi.

Bayram munosabati bilan yozilgan bir dasturxon atrofida nuroniy va faxriylar dildan suhbat qurishib dorulomon kunlarga shukronalar keltirishdi.

Ona Vatan oldida ajdodlar xizmati e’tirof etilib, ularning ruhi yodga olindi. Zero xotira hamisha muqaddas, qadr azizdir.