Surxondaryo viloyati Ichki ishlar boshqarmasi Jamoat xavfsizligi xizmati Probatsiya bo‘limi va uning joylardagi guruhlari xodimlari ishtirokida 2023 yil davomida amalga oshirilgan ishlar tahlili va yo‘l qo‘yilgan kamchiliklar muhokamasiga bag‘ishlangan yig‘ilish bo‘lib o‘tdi.

O‘zbekiston Respublikasi IIV Jamoat xavfsizligi Departamenti Probatsiya xizmati boshlig‘i o‘rinbosari podpolkovnik Xodjaev Rustam Egamberdievich hamda Surxondaryo viloyati IIB boshlig‘ining o‘rinbosari podpolkovnik Xidirov Baxrom Maxamatovichlar  ishtirokida o‘tkazilgan yig‘ilishda 2023 yil 12 oy davomida amalga oshirilgan ishlar va yo‘l qo‘yilgan kamchiliklar yo‘nalishlar kesimida muhokama qilindi.

Kun tartibidagi masala yuzasidan viloyat IIB JXX Probatsiya bo‘limi boshlig‘i podpolkovnik Shavkat Musurmanovning axboroti tinglandi. Unga ko‘ra viloyat Probatsiya guruhlari tomonidan nazorat ostidagi shaxslarni ijtimoiy hayotga moslashuvi, bandligini ta’minlash, ishga joylashtirish, ular tomonidan qayta jinoyat sodir etilishini oldini olish borasida bir qator ijobiy ishlar amalga oshirildi.

Jumladan, Mehnatga halol munosabatda bo‘lgan, qilmishidan chin ko‘ngildan pushaymon bo‘lib, tuzalish yo‘liga qat’iy o‘tgan mahkum sudlar tomonidan O‘zbekiston Respublikasi JKning 73-moddasi tartibida o‘talmay qolgan jazosidan muddatidan ilgari shartli ravishda ozod etildi.

2023 yilning o‘tgan davri mobaynida Jinoyat ishlari bo‘yicha shahar-tuman sudlari bilan hamkorlikda probatsiya nazoratidagi shaxslar uchun  175 marotaba «Sayyor sud» majlislari tashkil etilib, 10 367 nafar nazoratdagi shaxslarning ishtiroki ta’minlandi.

Viloyat bo‘yicha jami 976 nafar nazorat ostidagi shaxslarga ijtimoiy va huquqiy yordamlar ko‘rsatildi, jumladan;

- 640 nafariga huquqiy;

- 176 nafariga ID karta (pasporti) olinishida;

- 145 nafariga ijtimoiy;

- 15 nafariga pensiya olishlari bo‘yicha yordamlar ko‘rsatildi. 

Shu bilan birga vazirlik Probatsiya xizmati rahbariyati tomonidan  soha xodimlari o‘rtasida xizmat intizomi va qonunbuzilish holatlari oldini olish xizmat samaradorligini oshirish borasida zarur tavsiyalar bildirib o‘tildi.  

Yig‘ilish yakunida xizmat faoliyati davomida namuna ko‘rsatgan xodimlarga viloyat IIB rahbariyatining tashakkurnomalari tantanali ravishda topshirildi.