Turon zamini bo‘lmish O‘zbekistonda oila-muqaddas dargoh sanalib, er va xotin o‘rtasidagi nikoh esa buzilmas rishta sifatida qaraladi.

O‘zbekiston Respublikasi Konstitutsiyasining XIV bobi ham oilaga bag‘ishlangan bo‘lib, 63-moddasida “Oila jamiyatning asosiy bo‘g‘inidir hamda jamiyat va davlat muxofazasida bo‘lish huquqiga ega” deb ta’kidlangan.

Xalqimizda yangi oila vujudga kelishi bilan turmushda duch keladigan muammo va tashvishlarning yechimini yangi ro‘zg‘or egalariga tashlab qo‘yishmaydi.

Yangi oilaga ota – onalari, yaqin qarindoshlari, qolaversa mahalla kuy, mamlakatimizda faoliyati yo‘lga qo‘yilgan xotin-qizlar ko‘mitalari, “Oila” ilmiy-amaliy markazlari, Ichki ishlar boshqarmasi va boshqa mutasaddi tashkilot-idoralar ham e’tibor qaratib og‘irini yengil qilishga xizmat qiladi. Bir so‘z bilan aytganda bizning davlatimizda oila masalasiga davlat siyosati darajasida qaralib kelinadi.

Mahallalarda tashkil etilgan “yettilik” faollari tomonidan hududda huquqbuzarlik sodir etish va undan jabrlanish ehtimoli yuqori bo‘lgan oila a’zolariga qo‘llaniladigan ijtimoiy profilaktik chora-tadbirlarni amalga oshirish, mahalla faollari bilan birgalikda ular bilan yakka tartibdagi profilaktik tushuntirish ishlarni amalga oshirish, hududda milliy qadriyatlar, urf-odatlar va an’analarni targ‘ib qilish, sog‘lom ijtimoiy-ma’naviy muhitning barqarorligini ta’minlash yo‘nalishlarida uzviy hamkorlik yanada kuchaytirildi.

Respublikaning barcha mahallalarini jinoyatdan holi hududga aylantirish maqsadida O‘zbekiston mahallalari uyushmasi hamda O‘zbekiston Respublikasi Ichki ishlar vazirligi o‘rtasida tasdiqlangan o‘zaro hamkorlik memorandumi imzolanib, unga ko‘ra joriy yilning 5 iyul kunidan 5 avgust kuniga qadar keng qamrovli "Turmush" profilaktik tadbiri o‘tkazilmoqda.

Buning birgina misoli sifatida viloyatimizning At-Termiziy ilmiy tadqiqot markazida barcha shahar-tuman xokimi o‘rinbosarlari, viloyat Ijtimoiy himoya agentligi huzuridagi ayollarni reablitatsiya qilish va moslashtirish markazi mutaxassislari, 106 nafar otinoyilar ishtirokida Xotin-qizlar o‘rtasida va oila turmush doirasida sodir etilayotgan jinoyatlarning barvaqt oldini olishga qaratilgan o‘quv seminar tashkil etildi.

O‘quv seminarda ilmiy tadqiqot markazi o‘qituvchilari, Ichki ishlar boshqarmasi hamda Oila va xotin-qizlar boshqarmasi xodimalari bir qator dolzarb mavzularda o‘zlarining tanqidiy fikr-mulohazalarini ilgari surishdi.

Shuningdek, oilalarda o‘zaro nizolashish oqibatida ayollar tomonidan sodir etilayotgan jinoyatlar va ularni qanday bartaraf etish masalalari yuzasidan Surxondaryo viloyati IIB Jamoat xavfsizlik xizmati Huquqbuzarliklar profilaktikasi boshqarmasi boshlig‘i o‘rinbosari O‘.Eshimova tomonidan so‘z yuritilib, viloyat hududida xotin- qizlar va oila-turmush doirasida    sodir etilgan jinoyatlar tahliliga to‘xtalib o‘tdi.

O‘quv seminarida so‘z olgan din vakillari, islom dinida ayol va erkakning burch va vazifalari, farzand tarbiyasiga salbiy ta’sir ko‘rsatuvchi omillar hamda islomdagi oila bilan bog‘liq asosiy tamoyillar haqida savol-javob tariqasida bo‘lib o‘tdi.

O‘quv seminarda, ishtirokchilar viloyat hududida o‘tkazilayotgan keng qamrovli “Turmush” profilaktik tadbirida faol ishtirok etishlari, shu bilan birga  viloyat hududidagi barcha oilalarga kirib, ularning muammolarini o‘rganishda, aniqlangan muammolarni ijobiy bartaraf qilishda hamkorlikka chorladi. Ishtirokchilar o‘zlarining qiziqtirgan savollariga mutaxassislar tomonidan tegishli javoblar olishdi.