Xabaringiz bor, Surxondaryo viloyati hududida yashovchi 10 nafar 14 yoshdan 18 yoshgacha bo‘lgan huquqbuzarlik va jinoyat sodir etishga moyil, tarbiyasi og‘ir, bo‘lgan va salbiy hatti-xarakatlar sodir etganligi uchun profilaktik hisobga olingan yoshlar (qizlar) o‘rtasida kelgusida o‘tkazilayotgan huquqbuzarliklarni sodir etishlarini yoxud o‘zlari huquqbuzarlik va jinoyat qurboniga aylanishlarini oldini olishga qaratilgan “Kelajak sari” profilaktik tadbiri o‘tkazilishi davom etmoqda.

Surxondaryo viloyati Ichki ishlar boshqarmasi jamoat xavfsizligi xizmati huquqbuzarliklar profilaktikasi boshqarmasining voyaga yetmaganlarga ijtimoiy-huquqiy yordam ko‘rsatish markazida saqlanayotgan qizlar o‘rtasida o‘tkazilayotgan “Kelajak sari” profilaktik tadbirining to‘rtinchi kunida tadbir ishtirokchilarini ruhiy tushkunlik holatlaridan olib chiqish, ularda san’atga bo‘lgan qiziqishlarini uyg‘otish maqsadida kunning birinchi yarmida Termiz ixtisoslashtirilgan san’at maktabiga tashrif uyushtirildi.

U yerda  tadbir ishtirokchilariga maktab o‘quvchilari tomonidan hamda mahoratli ustoz va murabbiylar tomonidan mahorat darslari tashkil etib berildi.

Kunning ikkinchi yarmida qizlarni kelgusida hayotda o‘z o‘rinlarini topishida hamda bozor iqtisodiyotida raqobatdosh bo‘lgan kasb-hunarlarga bo‘lgan qiziqishlarini oshirish, bu bilan ularni oilada va jamiyatda ko‘makdosh bo‘lishi uchun, Surxondaryo viloyati “Hunarmandlar uyushmasi”ga  a’zo  bo‘lgan milliy urf-odatlarimiz bilan yo‘g‘rilib turgan turli-hildagi gilamdo‘zlik, kashtachilik, xona bezaklari, yo‘qolib borayotgan jandachilik, taqinchoqlar yasash kabi hunarlarning sir-asrorlarilari bilan yaqindan tanishtirildi.

Surxondaryo viloyatida nom qozongan usta kulol Jo‘raevlar sulolasining oltinchi avlodi ijod qilayotgan kulolchilik ustaxonasiga tashrif buyurilib, u yerda kulolchilik sirlaridan mahorat darsi o‘tkazildi.

Termiz Davlat Universiteti 2-bosqich talabasi kulol Narzullaeva Asaloy tomonidan qizlarga ko‘zalar, kosalar, turli xildagi meva va sabzavotlar yasalishi o‘rgatildi. Bu kabi tadbirlardan ko‘zlangan maqsad qizlarni yo‘qolib borayotgan milliy urf-odatlarimiz bilan tanishtirish va kasb-hunarga o‘rgatishdan iboratdir.

“Kelajak sari” profilaktik tadbiri davom ettirilmoqda.