Davlatimiz rahbarining 2021 yil 26 martdagi PF-6196-sonli “Jamoat xavfsizligini ta’minlash va jinoyatchilikka qarshi kurashish sohasida ichki ishlar organlari faoliyatini sifat jihatidan yangi bosqichga ko‘tarish chora-tadbirlari to‘g‘risida”gi Farmoni bilan Ichki ishlar organlarining tayanch punktlari negizida bosqichma-bosqich mahalla huquq-tartibot maskanlarini tashkil etish belgilangandi. Ushbu jarayon amaliyotga tatbiq etilib, hozirga qadar ular  “Mahalla huquq-tartibot maskan”larining qabul qilingan Nizomi asosida joylarda samarali faoliyat yuritib kelmoqda. Endilikda Vazirlar Mahkamasining 2022-yil 23-iyundagi 343-son “Mahalla huquq-tartibot maskanlari faoliyatini yanada takomillashtirish to‘g‘risida”gi qarori hamda “Obod va xavfsiz mahalla” tamoyili asosida viloyatdagi 724 ta mahallalarda xavfsiz muhitni yaratish borasidagi amalga oshirilayotgan ishlarni munosib rag‘batlantirish maqsadida joriy yilning 26 yanvar kuni  “Yoshlar markazi”da “Namunali mahalla huquq-tartibot maskanlari” ko‘rik tanlovining viloyat bosqichi o‘tkazildi. 

Tadbirda viloyat Ichki ishlar organlari shaxsiy tarkibi, IIV Surxondaryo akademik litseyi o‘quvchilari, Ichki ishlar idoralarida uzoq yillar samarali ishlab pensiyaga chiqqan nuroniylar, O‘zbekiston mahallalari uyushmasi Surxondaryo viloyati boshqarmasi xodimlari, Oliy ta’lim muassasalari talabalari, Mahalla va nuroniylar hamda Oila va xotin-qizlarni qo‘llab-quvvatlash boshqarmalari xodimlari hamda boshqa jamoatchilik vakillari ishtirok etdi.

Ko‘rik tanlovda 11 ta, ya’ni “Eng faol sektor rahbari”, “Eng faol profilaktika inspektori”, “Eng faol mahalla fuqarolar yig‘ini raisi”, “Eng faol hokim yordamchisi”, “Eng faol xotin-qizlar masalalari bo‘yicha inspektor”, “Eng namunali xotin-qizlar faoli”, “Eng faol yoshlar yetakchisi”, “Eng faol voyaga yetmaganlar masalalari bo‘yicha inspektor psixolog”, “Eng faol probatsiya xizmati inspektori”, “Eng faol patrul-post xizmati inspektori”, “Eng faol yo‘l-patrul xizmati inspektori” nominatsiyalarida g‘olib bo‘lganlar viloyat Ichki ishlar boshqarmasi boshlig‘ining tashakkurnomalari, pul va boshqa qimmatbaho sovg‘alari bilan taqdirlanishdi.

Shuningdek, ko‘rik tanlovda viloyatdagi 36 ta huquq-tartibot maskanlari ichidan eng namunalisi saralab olindi. Jumladan, namunali “Mahalla huquq-tartibot maskani” nominatsiyasida Qiziriq tuman IIB 1-sonli mahalla huquq targ‘ibot maskani profilaktika katta inspektori kapitan Norquvvatov Oybek Suyunovich 3-o‘ringa, Sho‘rchi tuman IIB 1-sonli mahalla huquq-tartibot maskani profilaktika katta inspektori kapitan Djumaboev Eldor Saitmurotovich 2-o‘ringa munosib deb topilib viloyat IIBning pul va qimmatbaho sovg‘alari berildi.

Tadbirning mutloq g‘olibi deb, Sherobod tuman IIB 2-sonli mahalla huquq-tartibot maskani profilaktika katta inspektori mayor Muqumov Yuldosh Abdullaevich e’tirof etilib, viloyat IIB boshlig‘ining tashakkurnomasi, pul va boshqa qimmatbaho sovg‘alari bilan taqdilandi va “Mahalla huquq-tartibot maskani” ko‘rik-tanlovining mintaqaviy bosqichiga ishtirok etish uchun yo‘llanmani qo‘lga kiritdi.