Surxondaryo viloyatida,  viloyat Ichki ishlar boshqarmasi, viloyat Prokuraturasi, Milliy gvardiya hamda viloyat xokimligining “Surxondaryo viloyati hududida jinoyatchilikni jilovlash bo‘yicha amalga oshirilishi lozim bo‘lgan profilaktik tadbirlarni yanada takomillashtirish to‘g‘risida”gi qo‘shma qarori ijrosini ta’minlash maqsadida, Surxondaryo viloyati hududida kriminogen vaziyatni barqarorlashtirish, kelgusida jinoyatlarni keskin kamaytirish bo‘yicha 2024 yilning birinchi choragi yakuniga qadar “Zarbdor to‘rt oylik” e’lon qilindi.

Shu munosabat bilan oylik doirasida viloyat IIB sohaviy xizmatlari, Termiz shahar IIB, prokuratura, Milliy gvardiya mas’ullari hamkorlikda faoliyat olib borib, xalqimiz tinchligini ta’minlash, jinoyatchilikni jilovlash, kriminogen vaziyatni yaxshilash va ijtimoiy profilaktikani kuchaytirishga alohida e’tibor qaratilmoqda.

Surxondaryo viloyati IIB boshlig‘ining birinchi o‘rinbosari Baxtiyor Inoqov hamda viloyat Prokurorining birinchi o‘rinbosari Ravshan Namozovlar tomonidan Termiz shahri hududida amalga oshiriladigan ishlar bo‘yicha tungi yo‘riqnoma o‘tkazildi. Yo‘riqnoma davomida, sektor rahbarlari, ichki ishlar organlari, prokuratura, Milliy gvardiya va boshqa mutasaddi tashkilotlar ishtirok etdi.

Hududda kriminogen vaziyatni yaxshilash borasida amalga oshirilishi lozim bo‘lgan ishlar yuzasidan har bir huquqtartibot organlari xodimlariga tegishli topshiriq va ko‘rsatmalar berildi.

Shuningdek, mas’ullar Termiz shahridagi tungi xizmatni o‘tash, qizil toifadagi mahallalarni o‘rganish maqsadida hududlarda bo‘lib, mahallaga biriktirilgan “yettilik” vakillari bilan uchrashib, ularning olib borayotgan faoliyatlarini ko‘zdan kechirishdi. Aniqlangan kamchillik va muammolarni bartaraf etish bo‘yicha topshiriqlar berildi.

Tungi o‘rganish davomida, probatsiya hisobida turgan shaxslarning xonadoniga borilib, ular bilan profilaktik tushuntirish ishlari olib borildi.

Viloyatning barcha hududlarida, kriminogen vaziyatni yaxshilashga qaratilgan  tezkor-profilaktik tadbirlari o‘tkazilishi davom etmoqda.