Surxondaryoda ichki ishlar organlari xodimlari uchun “Yangi O‘zbekistonda el aziz, inson aziz!” shiori ostida bayram tadbiri tashkil etildi
Joriy yilning 4 sentabr kuni “Muhtasham saroy”da “Yangi O‘zbekistonda el aziz, inson aziz” shiori ostida Davlatimiz mustaqilligining 31 yilligiga bag‘ishlab, Surxondaryo viloyati ichki ishlar boshqarmasi va uning quyi tizim xodimlari, mehnat faxriylari, viloyat IIB tibbiyot bo‘limi xodimlari, xizmat vaqtida xalok bo‘lgan xodimlarning oila a’zolari, ishchi xizmatchilari uchun bayram tadbiri o‘tkazildi.
Bayram ishtirokchilari Termiz garnizoni harbiy orkestri ijrosidagi tantanavor marshlar bilan kutib olindi. “Muhtasham” tantanalar saroyida mehmon uchun bayramona dasturxon bezatilgan. Sahna poyida gullar rangli sharlar qo‘yilgan. Sahna markazida gullar fonida “Yangi O‘zbekistonda el aziz, inson aziz!” deb yozilgan banner, zal uzra vatanparvarlik ruhidagi kuy ohista yangrab turibdi.
Vatanimiz tinchligi, xalqimiz osoyishtaligi yo‘lida mardonavor xizmat qilib kelayotgan Ichki ishlar xodimlari uchun tashkil etilgan, bayram tadbirida, Surxondaryo viloyati xokimi T.A.Bobolov so‘zga chiqib, shodiyona bilan tadbir ishtirokchilarini muborakbod etib, bayram tadbirini ochiq deb e’lon qildi.
Shundan so‘ng, xizmat faoliyati davomida yuqori natijalarga erishgan xodimlar viloyat hokimining faxriy yorlig‘i hamda qimmatbaho esdalik sovg‘alari bilan tantanali ravishda taqdirlandi. Shuningdek, Jarqo‘rg‘on tumani ichki ishlar bo‘limiga Damas avtomashinasi topshirildi.
Bayram tadbiri davomida, tabrik uchun so‘z navbati Surxondaryo viloyati Ichki ishlar boshqarmasi boshlig‘i polkovnik A.S.Ismoilovga berildi.
Boshqarma boshlig‘i O‘zbekiston Respublikasi Ichki shlar Vazirining tabrigini o‘qib eshittirdi va Ichki ishlar vazirining mukofotlari, maxsus unvonlari, boshqarma boshlig‘ining esdalik qo‘l soatlari, pul mukofotlari bilan taqdirladi.
Shuningdek, ichki ishlar tizimida o‘tkazilgan, “Eng yaxshi ichki ishlar organi boshlig‘i”, “Eng yaxshi tezkor xodim”, “Eng yaxshi tergovchi”, “Eng yaxshi profilaktika inspektori” nominatsiyasi g‘oliblari, “San’atda xavaskor iste’dodlar” Respublika ko‘rik tonlovida 2-o‘rinni qo‘lga kiritgan “Jayxun” jamoasi taqdirlandi.
Bayram tadbirida tizimda samarali faoliyat olib borgan bir guruh xodimlar nafaqaga kuzatildi.
Bir qator ichki ishlar organlari xodimlariga mukofotlar topshirildi.
Bayram tadbiri davomida, san’atkorlar tomonidan ijro etilgan kuy qo‘shiq va raqslar bayram ishtirokchilarining ko‘ngliga bayromona kayfiyat ulashdi.
Surxondaryo viloyati IIB Axborot xizmati
