Joriy yilning 4 mart kuni Surxondaryo viloyati IIB boshlig‘i o‘rinbosari Ma’naviy-ma’rifiy ishlar va kadrlar bilan ta’minlash xizmati boshlig‘i podpolkovnik Sh.Shadiev ishtirokida viloyat Ichki ishlar boshqarmasi hamda shahar-tuman IIBlari shaxsiy tarkibi bilan video selektor tarzida “Ayollarning baxti – xalqimiz, jamiyatimizning baxtidir” mavzusida navbatdagi “Ma’naviyat va ma’rifat” darsi o‘tkazildi.

Mavzu tafsilotlari yuzasidan Termiz muhandislik texnologiya instituti uzbek tili va adabiyoti kafedrasi katta o'qituvchisi N.Xudoyorovaning ma’ruzasi tinglandi.

Shundan so‘ng, Respublika hududida ichki ishlar organlari xodimlari tomonidan o‘tgan bir hafta davomida sodir etilgan qonun hamda xizmat intizomi buzilish holatlari to‘g‘risidagi ma’lumotlar O‘zbekiston Respublikasi IIV Shaxsiy xavfsizlik bosh boshqarmasi Surxondaryo viloyati bo‘yicha boshqarmasi mas’ul xodimi tomonidan shaxsiy tarkibga o‘qib eshittirildi.

“Ma’naviyat va ma’rifat” darsi davomida O‘zbekiston Respublikasi IIV Shaxsiy xavfsizlik bosh boshqarmasi Surxondaryo viloyati bo‘yicha boshqarmasi boshlig‘i tomonidan ba’zi xodimlarning yurish turishi, xizmat intizomi, qonunchilikka qat’iy rioya qilishi hamda fuqarolar tomonidan qilinayotgan murojaatlar bilan ishlash borasidagi xato-kamchilliklari bilan birga xatti-harakatlari tanqid qilindi.

Shuningdek, o‘z xizmat vazifasiga sidqidildan yondashib, hamkasblariga o‘rnak bo‘lib, korrupsion jinoyatlarning oldini olishda namuna ko‘rsatib kelayotgan Jamoat xavfsizligi xizmati yo‘l harakati xavfsizligi boshqarmasi to‘rtinchi safarbar guruhi yo‘l-patrul xizmati inspektori hamda Termiz shahar ichki ishlar boshqarmasi Jamoat xavfsizligi xizmati 2-son ichki ishlar bo‘limi huquqbuzarliklar profilaktikasi guruhi profilaktika inspektori boshqarma boshlig‘ining qimmatbaho sovg‘asi bilan taqdirlanib, el-yurt oldida qilayotgan xizmatlari e’tirof etildi.