O‘zbekiston Respublikasi IIVning 2023 yil 20 fevral kunidagi “Ichki ishlar organlarida kadrlar bilan ta’minlash faoliyatini yanada takomillashtirish chora-tadbirlari to‘g‘risida”gi tegishli buyrug‘i talablari asosida Surxondaryo viloyati ichki ishlar organlarida rahbarlik lavozimlariga kadrlar tayyorlash va joy-joyiga qo‘yish tizimini yanada takomillashtirish, rahbar kadrlarni tayyorlash, psixologik tushunchalar berish, zimmasiga yuklatilgan vazifalarga nisbatan mas’uliyatlarini yanada oshirish, jamoadagi ma’naviy-ruhiy muhitni yanada yaxshilash hamda xodimlarga ichki ishlar organlari tizimida va jinoyatchilikka qarshi kurash sohasida o‘tkazilayotgan islohotlarning mazmun-mohiyatini o‘z vaqtida yetkazish, ularni rahbar lavozimlarda xizmat o‘tash uchun tayyorlashning ilg‘or tajribasini joriy etish maqsadida, joriy yilning 28-29-mart kunlari o‘quv-seminari tashkil etildi.

O‘quv kurslarini sifatli hamda samarali tashkil etish maqsadida, O‘zbekiston Respublikasi Prezidenti Adminstratsiyasi tasarrufiga kiruvchi lavozimlarga zahiraga kiritilgan viloyat IIB sohaviy xizmatlarining yetuk malakali kadrlari hamda oliy ta’lim muassasalarining professor o‘qituvchilari jalb etildi.

O‘quv-amaliy seminar davomida amaldagi rahbar kadrlar zahirasiga kiritilgan xodimlari lavozimga ko‘tarilish uchun zarur bo‘lgan kasbiy, ishbilarmonlik, shaxsiy va ma’naviy axloqiy fazilatlariga ega, salohiyatli, yetuk, korrupsiyaga nisbatan murosasiz munosabatda bo‘lgan, egallagan lavozimlarida o‘zini ijobiy tomondan namoyon qilgan va qisqa muddatda rahbarlik lavozimlarini egallashga loyiq bo‘lgan, yuqori malakali xodimlarni shakillantirish ko‘zda tutildi.

Shuningdek, tashkil etilgan o‘quv-amaliy seminarda, rahbar xodimlarning jismoniy va jangovar tayyorgarliklarini yana bir bor nazoratdan o‘tkazish maqsadida, makarov to‘pponchasidan o‘q otish mashg‘uloti o‘tkazilib, merganlik mahorati sinovdan o‘tkazildi.