Joriy yilning 16 dekabr kuni viloyat IIB boshlig‘i o‘rinbosari, Ma’naviy-ma’rifiy ishlar va kadrlar bilan ta’minlash xizmati boshlig‘i podpolkovnik Sh.Shadiev ishtirokida viloyat Ichki ishlar boshqarmasi hamda shahar-tuman IIBlari shaxsiy tarkibi bilan video selektor tarzida “Xonlik davrida jamoat tartibi va xavfsizlikni ta’minlash” mavzusida navbatdagi “Ma’naviyat va ma’rifat” darsi o‘tkazildi.

Mavzu tafsilotlari yuzasidan, Termiz Davlat Universiteti Tarix fanlari doktori professor Toshkenboy Pardaevning ma’ruzasi tinglandi.

Shundan so‘ng, Respublika hududida ichki ishlar organlari xodimlari tomonidan sodir etilgan qonun hamda xizmat intizomi buzilish holatlari to‘g‘risida O‘zbekiston Respublikasi IIV Shaxsiy xavfsizlik bosh boshqarmasi Surxondaryo viloyati bo‘yicha boshqarmasi boshlig‘i podpolkovnik Q.Samandarov tomonidan shaxsiy tarkibga xodimlarning xizmat intizomi hamda qonuniylikka rioya qilishlari to‘g‘risida tanqidiy fikrlar bildirildi.

“Ma’naviyat va ma’rifat” darsi davomida, O‘zbekiston Respublikasi IIVning tegishli buyruqlari bilan Surxondaryo viloyati IIB Ma’naviy-ma’rifiy ishlar va kadrlar bilan ta’minlash xizmati psixologik ta’minlash guruhi katta psixolog-poligrafologi katta leytenant Mirsaid Qodirov Ichki ishlar vazirligining “Esdalik qo‘l soati” bilan hamda Termiz shahar Ichki ishlar boshqarmasining  “Ma’naviyat va ma’rifat xonasi” 2024 yil 30 noyabr kuni “Ichki ishlar organlarida “Namunali ma’naviyat va ma’rifat xonasi” ko‘rik-tanlovida ishtirok etib, faxrli uchinchi qo‘lga kiritgani uchun Uchinchi darajali diplom va o‘n million so‘m miqdorida pul mukofoti bilan taqdirlandi.

Shuningdek, viloyat IIB boshlig‘ining tegishli buyrug‘i bilan ichki ishlar organlari tizimida uzoq yillar samarali xizmat olib borgan Safarov Saydullo Qarshiboevichning xizmatlari e’tirof etilib, tantanali ravishda pensiyaga kuzatildi.

Dars davomida, viloyat IIB Tashkiliy boshqarma Yuridik ta’minlash guruhi yetakchi yuriskonsulti podpolkovnik Murod Shaymardonov hamda viloyat IIB boshlig‘i o‘rinbosarining Tashkiliy shtat ishlari bo‘yicha yordamchisi, podpolkovnik Baxtiyor Chorievlar tomonidan O‘zbekiston Respublikasi IIVning tegishli buyruqlariga kiritlgan o‘zgartirish va qo‘shimchalar mazmun mohiyati tushuntirildi.