Viloyat IIB boshlig‘ining 2023 yil 21 oktabr kunidagi O‘zbekiston Respublikasi ichki ishlari organlari tashkil etilganligining 32 yilligi hamda 25 oktabr – “Ichki ishlar organlari xodimlari kuni” munosabati bilan kasb bayramini yuqori saviyada va ko‘tarinki ruhda keng nishonlash to‘g‘risida”gi farmoyishining ijrosini ta’minlash maqsadida, Surxondaryo viloyati Ichki ishlar boshqarmasi rahbariyati ham ichki ishlar organlarida xizmat olib borayotgan xodimlar va ishchi xizmatchilar uchun bayram oldidan arzonlashtirilgan oziq-ovqat savdo yarmarkasini tashkil qildi. Viloyat IIB hovlisida tashkil etilgan yarmarka rastalarida sifatli va arzonlashtirilgan qishloq xo‘jaligi mahsulotlari, un, yog‘, shakar, poliz mahsulotlari, meva-sabzavotlar, turli yaxna ichimliklar, baliq, mol, qo‘y va tovuq go‘sht mahsulotlari, tuxum va boshqa turdagi har xil mahsulotlar o‘rin olgan.

– Hamkasblarim bilan birga bayram dasturxoni uchun zarur bo‘lgan oziq-ovqat mahsulotlarini xarid qildim. Eng muhimi, mahsulotlar hamyonbob arzon va sifatli. Endi bozorga borib, vaqtimizni yo‘qotmaymiz. Bunday yaratilgan qulayliklardan boshqa hamkasblarim qatori men ham mamnunman, shu o‘rinda ushbu arzonlashtirilgan Savdo yarmarkasini tashkil qilib bergan rahbariyatimizga minnadorchiligimni izhor etaman, – deydi viloyat IIB xodimi, kapitan Abror Boboev.

Arzonlashtirilgan savdo yarmarkasi viloyatning barcha shahar-tuman ichki ishlar bo‘limlarida ham tashkil etilmoqda.