Bugun 1 oktabr — O‘qituvchi va murabbiylar kuni munosabati bilan ichki ishlar organlari boshqarmasi rahbariyati tashabbusi bilan ma’naviy-ma’rifiy tadbir tashkil etildi. Unda Surxondaryo viloyati IIB boshlig‘i polkovnik Timur Ismailov boshchiligida ichki ishlar organlari faxriylari hamda xizmat burchini ado etish chog‘ida halok bo‘lgan xodimlarning oila a’zolari holidan xabar olindi.  

Uchrashuv davomida faxriylarga yuksak ehtirom va minnatdorlik ifodalandi. Ularga ko‘rsatilgan e’tibor va g‘amxo‘rlik, ichki ishlar tizimidagi yosh kadrlar uchun ham katta tarbiya maktabi bo‘lib xizmat qiladi.

Shuningdek, xizmat burchini bajarish yo‘lida hayotini fido etgan mard va jasur xodimlar xotirasi yod etildi, ularning oilalariga ma’naviy, moddiy va tibbiy ko‘mak ko‘rsatildi.

Tadbirda so‘z olganlar ta’lim-tarbiya va jamoat tartibini ta’minlash sohasida faxriylarning boy tajribasi, jasorat va fidoyilik misollari har doim yosh avlod uchun ibrat ekanligi ta’kidlandi.

Bayram asnosida, o‘z umrini ilm fanga baxshida etib, kelajak avlodga ta’lim tarbiya berib kelayotgan Termiz Davlat universiteti rektori Abduqodir Toshqulovning ham xonadonida bo‘lib, bayram bilan qutladi, dildan suhbat qilindi.

Shu tariqa, O‘qituvchi va murabbiylar kuni ichki ishlar organlarida ham ma’naviyat, vatanparvarlik va insonparvarlik ruhi bilan nishonlandi.

Bu tashriflar yana bir bor shuni ko‘rsatdiki, ichki ishlar tizimida xizmat qilgan har bir inson – tirik bo‘lsin yoki hayotini fido etgan bo‘lsin – unutilmaydi. Faxriylar o‘z tajribasi va duolari bilan yoshlarga ibrat, halok bo‘lgan hamkasblar esa abadiy xotira sifatida qalblarda yashaydi.

Ustoz va murabbiylar kunida amalga oshirilgan bu tashriflar nafaqat hurmat-izzat ifodasi, balki insoniy qadriyatlarning, mehr-oqibat va samimiy g‘amxo‘rlikning yorqin namunasi bo‘ldi.