Bugun Surxondaryo viloyati Ichki ishlar boshqarmasida 27 iyun – “Matbuot va ommaviy axborot vositalari xodimlari kuni” hamda 30 iyun –“Yoshlar kuni” munosabati bilan bayram tadbiri tashkil etildi.

Tadbirda viloyat IIB boshlig‘i polkovnik Timur Ismailov viloyat Ichki ishlar organlarida xizmat olib borayotgan yosh xodimlar va vohadagi bir guruh matbuot va ommaviy axborot vositalari vakillari ishtirok etishdi.

Tadbir avvalida, boshqarma boshlig‘i barcha ommaviy axborot vositalari hamda viloyat IIOda xizmat olib borayotgan yosh xodimlarni bayram bilan tabriklab, ularga yo‘llangan Prezident tabrigini o‘qib eshittirdi hamda bugun mamlakatimizda olib borilayotgan keng ko‘lamli islohotlarga qo‘shayotgan hissalari qatori, jinoyat va huquqbuzarliklar profilaktikasi borasida amalga oshirilayotgan ishlar e’tirofga munosib ekanligini, Muhtaram Prezidentimiz Shavkat Mirziyoevning “Haqiqatan ham har qanday murakkab sharoitda ham adolat tamoyiliga, o‘zining hayotiy va ijodiy prinsiplariga sodiq qolish, odamlarni qiynayotgan kamchilik va muammolarni dadillik bilan ko‘tarib chiqish, ularni bartaraf etish uchun jamoatchilik fikrini shakllantirishga, avvalo, sizlar kabi ma’naviy jasorat egalarigina qodir bo‘ladi”, – deya bildirgan fikrlari Siz qalam ahliga bo‘lgan yuksak e’tiborning ifodasidir deya ta’kidladi.

Tadbir so‘ngida, boshqarma boshlig‘ining joriy yil 25 iyun kunidagi tegishli buyrug‘iga asosan, bir guruh matbuot va ommaviy axborot vositalari vakillari, boshqarma axborot xizmati xodimlari hamda xizmat vazifasini bajarish davomida hamkasblariga o‘rnak bo‘lib kelayotgan yosh xodimlarga tashakkurnoma hamda bir martalik pul mukofotlari tantanali ravishda topshirildi.