2024 yil 31 mart kuni Surxondaryo viloyati IIB majlislar zalida Migratsiya va fuqarolikni rasmiylashtirish boshqarmasi va uning quyi tizimi shaxsiy tarkib xodimlari hamda ularning ota-onalari, turmush o‘rtoqlari taklif etilib, Migratsiya va fuqarolikni rasmiylashtirish boshqarmasi va uning hududiy bo‘linmalarida xizmat, ijrochilik intizomini ta’minlash va korrupsiyaga qarshi kurashish sohasida yo‘l qo‘yilayotgan kamchiliklar, ularni bartaraf etish bo‘yicha manzilli chora-tadbirlar belgilash yuzasidan yig‘ilish bo‘lib o‘tdi.

O‘tkazilgan mazkur yig‘ilish Surxondaryo viloyati IIB boshlig‘i o‘rinbosari podpolkovnik Sh.F.Shadiev, O‘zbekiston Respublikasi Shaxsiy xavfsizlik bosh boshqarmasi Surxondaryo viloyati bo‘yicha boshqarmasi boshlig‘i podpolkovnik Q.B.Samandarov hamda Surxondaryo viloyati IIB Migratsiya va fuqarolikni rasmiylashtirish boshqarmasi boshlig‘i o‘rinbosari podpolkovnik X.Dilmonovlar huzurida o‘tkazildi.

Dastlab viloyat ichki ishlar boshqarmasi boshlig‘i o‘rinbosari podpolkovnik Shadiev Sherzod Fayzullaevich so‘zga chiqib, bugungi kunda ichki ishlar organlari xodimlarining harbiy-vatanparvarlik tuyg‘usini, ma’naviy saviyasini va intellektual salohiyatini yuksaltirishni ta’minlash, ularda mamlakatimizning qadimiy va boy madaniyati, azaliy qadriyatlari, udumlari va an’analariga asoslangan keng dunyoqarashini yanada  shakllantirish yuzasidan bir qator manzilli ishlar amalga oshirib kelinayotganligini, ammo ba’zi bir xodimlar ushbu yaratilayotgan shart-sharoitlardan unumli foydalanmasdan xozirgi kunda xizmat intizomi va qonunchilikka rioya etmasdan javobgarlikka tortilib ketayotganligini qayd etdi.

Shuningdek, kelgusida xodimlarimiz jonajon O‘zbekistonimizda hukm surayotgan tinchlik-osoyishtalik, millatlararo totuvlik, bag‘rikenglik muhitini ko‘z qorachig‘idek asrab-avaylash, bunday bebaho boylikni muttasil mazmunan boyitib borish, O‘zbekiston taraqqiyoti yo‘lida bir mushtga jipslashib, davlatimiz rahbariga tayanch va suyanch bo‘lib xizmat qilish, kelgusi avlodlarni shu ruhda kamol toptirish muqaddas burch ekanligini ta’kidlab o‘tdi.

Uchrashuv davomida 2023 yil davomida viloyat ichki ishlar organlari xodimlari tomonidan sodir etilgan salbiy hamda ijobiy holatlar asosida tayyorlangan videofilm xodimlarning kelgusi xizmat faoliyatlarida o‘zlariga tegishlicha to‘g‘ri xulosa chiqarishlari uchun yig‘ilganlarning e’tiboriga namoyish etildi.

Namoyish etilgan film yakunida Ichki ishlar vazirligi Shaxsiy xavfsizlik bosh boshqarmasi Surxondaryo viloyati bo‘yicha boshqarmasi boshlig‘i podpolkovnik Samandarov Qudrat Bazarbaevich hamda xodimlarning oila a’zolari so‘zga chiqishib, namoyish etilgan ushbu videofilmdan har bir xodim o‘ziga tegishli bo‘lgan xulosa chiqarib olishlari to‘g‘rsida ta’kidlab o‘z fikr mulohazalarini uchrashuv ishtirokchilariga bildirib o‘tishdi.

Tadbir so‘ngida xizmat faoliyati davomida ijobiy natijalarga erishib hamkasblariga o‘rnak bo‘lib kelayotgan bir guruh xodimlarning ota-onalariga viloyat ichki ishlar boshqarmasi boshlig‘ining tashakkurnomalari hamda esdalik sovg‘alari tantanali ravishda topshirildi.