Bugungi kunda ichki ishlar organlarida xizmat qilayotgan xotin-qizlarni har tomonlama qo‘llab-quvvatlash, jamoalarda ularning o‘rni va rolini oshirish, iste’dodlarini namoyon qilishlariga imkoniyat yaratish, kelgusida xodimalarning ma’naviy va intellektual saviyasini yanada yuksaltirish, kasbiy va jismoniy tayyorgarligini takomillashtirish, ular o‘rtasida sog‘lom raqobat muhitini shakllantirish bo‘yicha bir qator manzilli chora-tadbirlar amalga oshirilib kelinmoqda.

O‘zbekiston Respublikasi Ichki ishlar vazirining 2025-yil 07-iyul kunidagi tegishli buyrug‘iga asosan, joriy yilning 26-iyul kuni Surxondaryo viloyati ichki ishlar organlarida xizmat olib borayotgan xodimalar o‘rtasida “Vatan mehri yuragimda” shiori ostida “To‘maris izdoshlari” respublika musobaqasining birinchi bosqichi bo‘lib o‘tdi.

Ushbu musobaqada ishtirokchilar dastlab, PM pistoletidan amaliy o‘q otish, harbiy tayyorgarlik, jismoniy tayyorgarlik, eruditsiya yoki bilimdonlik va epchil va orasta beka shartlari asosida o‘zaro bellashishdi.

Musobaqaning viloyat bosqichi yakunida g‘oliblikni qo‘lga kiritgan ishtirokchilar, respublika bosqichida ishtirok etish yo‘llanmasini qo‘lga kiritishdi.

Bu kabi musobaqalarni muntazam ravishda tashkillashtirib borish, tizimda xizmat olib borayotgan xodimalar ongida tariximiz, milliy an’analarimiz va urf odatlarimizga bo‘lgan chuqur hurmat va ehtiromni yuksaltirish, doimo g‘alabaga bo‘lgan intilishi va ishonchini, yuqori jismoniy, jangovar-ahloqiy ruhiyatini va yuksak vatanparvarlik tuyg‘usini shakllantirishda muhim ahamiyat kasb etadi.