11 Fevral 2024 yil 259

Surxondaryo viloyati IIB boshlig‘i Sho‘rchi tumanida alohida toifada turuvchi yoshlar bilan uchrashuv o‘tkazib, ularning muammolarini o‘rgandi.

Kuni kecha Sho‘rchi tumanidagi Sho‘rchi don mahsulotlari mas’uliyati cheklangan jamiyati majlislar zalida Surxondaryo viloyati IIB boshlig‘i polkovnik Ismailov Timur Kamalatdinovich tomonidan tumanda qizil toifaga kiritilgan mahallada istiqomat qiluvchi ichki ishlar organlarida alohida toifadagi hamda Probatsiya hisobida turgan yoshlar bilan uchrashuv o‘tkazildi.

Uchrashuvda, tuman hokimi Zokirov Ulug‘bek Xurramovich, sektor rahbarlari, ta’lim muassasa rahbarlari, idora va tashkilotlar, Yoshlar ittifoqi, mahalla yettiligi ishtirok etishdi.

Dastavval, Sho‘rchi tumanida jinoyatchilikning oldini olishga qaratilgan masalalar yuzasidan o‘rganishlar olib borildi.

Tumanning 12 oy yakuni bilan 53 ta mahallaning 13 tasi qizil toifada qolganligi,  bundan tashqari, tumanda 5 ta “Bobotog‘”, “Navro‘z”, “Do‘stlik”, “Bobur” va “Xayrobod” mahallalari oxirgi 3 yildan buyon “qizil” toifada saqlanib qolayotganligi tanqid ostiga olinib, huquqni muhofaza qiluvchi organlarning kelgusida kriminogen vaziyatni barqarorlashtirish, jinoyat va huquqbuzarliklarni barvaqt oldini olish borasida kelgusida amalga oshirilishi lozim bo‘lgan chora-tadbirlar taqdimoti bilan tanishildi.

         Taqdimotda tuman ichki ishlar bo‘limi tomonidan jinoyatchilikni “mahallabay” jilovlashning yangi tizimi, yo‘l harakati xavfsizligini ta’minlash, hududlarni kameralashtirish ishlari o‘rganildi.

Shundan so‘ng, qizil toifadagi 13 ta mahallasida istiqomat qilib kelayotgan yoshlarning muammolari o‘rganilib, murojaatlari qabul qilindi.

Uchrashuv davomida, yoshlar tomonidan uy-joy olish uchun subsidiya ajratish, tadbirkorlik faoliyatlarini yo‘lga qo‘yish va kengaytirish uchun kredit mablag‘lari olish, ishga joylashish, tikuvchilik bilan shug‘ullanishlari uchun tikuv mashinkasi, payvandlash jihozlari olishlari, probatsiya nazoratidan muddatidan ilgari ozod qilish va boshqa masalalar yuzasidan murojaatlari tinglanib, ularga ijobiy yechim izlandi.

O‘z muammoli masalalariga yechim izlab kelgan 188 nafar yoshlarning
68 ga  yaqin murojaatlari tinglanib, 24 tasi shu joyning o‘zida ijobiy hal etilgan bo‘lsa, 20 nafariga huquqiy tushuntirishlar berildi.

O‘rganish uchun muddat talab etilgan 12 ta murojaatlarning ijrosi boshqarma boshlig‘i tomonidan nazoratga olingan bo‘lsa 12 ta murojaat mazmunan ko‘rib chiqilish uchun tegishli tashkilot va idoralarga yuborildi.

Shuningdek, uchrashuv davomida, bir nafar fuqaroligi bo‘lmagan shaxsga O‘zbekiston Respublikasi fuqaroligi aks etgan fuqarolik ID kartasi tantanali ravishda topshirildi.

Yoshlar bilan o‘tkazilgan ushbu uchrashuvdan ko‘zlangan asosiy maqsad esa kelgusida ushbu toifadagi yoshlarni ma’naviy dunyoqarashini mustahkamlash, ularni bo‘sh vaqtlarini mazmunli tashkil etish orqali bandligini ta’minlash, jinoyat va huquqbuzarlik yo‘liga kirishining oldini olishga qaratilgandir.

Text to speech