Xabaringiz bor aholini qiynab kelayotgan muammolarini o‘rganish orqali ularga ijobiy yechim topish masalalarida Surxondaryo viloyati IIB boshlig‘i 3-sektor rahbari polkovnik Abduvohid Ismoilov tomonidan 14 dekabr kuni Surxondaryo viloyatining Denov tumani Ichki ishlar boshqarmasida hamda 15 dekabr kuni Sherobod tumanlari Ichki ishlar bo‘limlarida fuqarolarning sud-huquq tizimi sohasiga oid murojaatlari yuzasidan sayyor qabullar o‘tkazildi.

O‘tkazilgan “Sayyor qabul”larda viloyat IIB boshlig‘i o‘rinbosarlari, sohaviy xizmat rahbarlari va mas’ullari, murojaatlariga yechim izlab kelgan fuqarolar hamda OAVlari vakillari ishtirok etishdi.

Fuqarolarning muammolarini o‘rganish davomida Denov tumanida 19 ta murojaatlar qabul qilinib, murojaatlarning 12 tasi joyida ijobiy hal etilgan bo‘lsa, Sherobod tumanida o‘tkazilgan qabulda 23 ta murojaatlar qabul qilinib, 13 ta muammoli murojaatlar ijobiy hal qilindi.

Qo‘shimcha o‘rganishni talab qiladigan murojaatlar ijrosi boshqarma boshlig‘i tomonidan alohida nazoratga olinib, mutasaddilarga har bir murojaat bo‘yicha muddatlar belgilanib, tegishli ko‘rsatmalar berildi.

Aytish kerakki, har bir muammoli murojaatning ortida inson haq-huquqi, uning taqdiri aks etganligini chuqur anglagan holda har bilan qilingan murojaatlarni qonunda belgilangan tartibda ijobiy hal qilishga qaratilgan sa’yi harakatlar ichki ishlar organlari rahbarlari hamda xodimlari tomonidan izchillik bilan olib borilmoqda.