Joriy yilning  25 iyun kuni Denov tuman hokimligi binosida, tumandagi kriminogen vaziyat, shu kunga qadar sodir etilgan jinoyat va huquqbuzarliklar, Istiqlol mahallasida sodir bo‘lgan o‘ta og‘ir turdagi jinoyat hamda “Bek” MChJga qarashli savdo do‘konlaridagi yong‘in muhokamasiga bag‘ishlangan tanqidiy ruhdagi yig‘ilish bo‘lib o‘tdi.

O‘tkazilgan yig‘ilishda, Surxondaryo viloyati IIB boshlig‘i polkovnik Timur Ismailov, tuman hokimi Ilhom Abrorov, tuman sektor rahbarlari, mas’ul idora va tashkilot vakillari, “mahalla yettilik” vakillari va nazorat ostidagi shaxslar, keng jamoatchilik hamda ommaviy axborot vositalari vakillari ishtirok etdi.

Xususan, hozirgi kunda tumanning kriminogen vaziyati, «qizil» toifada qolayotgan mahallarda amalga oshirilayotgan ishlar, yo‘l qo‘yilgan xato va kamchiliklar, Istiqlol mahallasida sodir etilgan o‘ta og‘ir jinoyatning kelib chiqish sabab va shart-sharoiti haqida boshqarma boshlig‘i yig‘ilish ishtirokchilariga qisqacha ma’lumot berib, jinoyatga sabab bo‘lgan har bir holat tahlil etilib, bunda oiladagi nosog‘lom muhit, qo‘ni – qo‘shni, mahalla ko‘y, qarindoshlarning ham salbiy ta’siri  ta’kidlandi.

Shuningdek, "Bobur" mahallasida joylashgan “Bek” MChJga qarashli savdo majmuasida sodir bo‘lgan yong‘in joyiga viloyat IIB boshlig‘i, viloyat va tuman mas’ullari yetib borishib, savdo majmuasida yuzaga kelgan yong‘in talafotlarini ko‘zdan kechirib, bozor hududida faoliyat olib borayotgan aholi vakillari bilan profilaktik tushuntirish ishlari olib borilganligi ta’kidlandi.

Yig‘ilishda, mas’ullarga, kriminogen vaziyatni barqarorlashtirish, jinoyat sodir etishga moyil bo‘lgan fuqarolar bilan tizimli ishlash bo‘yicha yo‘lga qo‘yilgan mexanizmni harakatga keltiruvchi “richag” bu “mahalla yettilik” vakillari bir yoqadan bosh chiqarib, hamjihatlikda faoliyat yuritmasligi mana shunday ko‘ngilsiz mudhish voqealarga sabab bo‘lishini yana bir bor hayotiy misollar bilan keltirdi.

Shu asnoda “mahalla yettiligi” faollarini yana bir bor hushyorlikka chaqirib, hududda kelib chiqayotgan kichkina ko‘ringan muammo va turli nizolarni o‘z vaqtida o‘rganib, ularni bartaraf etishga mas’ul ekanliklari uqtirilib zaruriy ko‘rsatma va topshiriqlar berildi.

Aytish kerakki, so‘nggi yillarda O‘zbekiston Respublikasi Vazirlar Mahkamasining tegishli qarori ijrosi doirasida, huquqbuzarliklar profilaktikasini amalga oshiruvchi organ hamda muassasalar ishtirokida jinoyat sabablarini o‘rganish, ularni sodir etilishiga imkon bergan shart-sharoitlarni aniqlash va bartaraf etish masalalarini joyiga chiqqan holda «mahallabay» va «sohabay» muhokama qilish tartibi joriy etilgan.

Bu amaliyotni e’tiborli jihati xalq bilan bo‘layotgan muloqotlar jarayonida jinoyatchilikni jilovlash bo‘yicha aholi vakillarining ham taklif va tashabbuslari o‘rtaga tashlanmoqda.