Bugun, Termiz davlat muhandislik va agrotexnologiyalar universitetida, Termiz shahrining “Jo‘yjangal” mahallasi hududida Surxondaryo viloyati Ichki ishlar boshqarmasi boshlig‘i T.Ismailov, Termiz shahar hokimi O‘.To‘raev, sektorlar, tegishli korxona va tashkilot rahbarlari hamda mahalla yettiligi faollari ishtirokida ushbu hududda sodir etilgan jinoyat muhokamasi bo‘lib o‘tdi.

O‘tkazilgan muhokama yig‘ilishida, dastlab Termiz shahar hokimi O‘.To‘raev kirish so‘zini olib, kun tartibiga qo‘yilgan muhim masala yuzasidan qisqacha ma’lumot berib o‘tdi. Shundan so‘ng, shahar Ichki ishlar boshqarmasi boshlig‘i M.Boltaev Jo‘yjangal mahallasi hududida oila turmush doirasida sodir etilgan noxush holat sabablari va uning oqibatlari jamoatchilikka atroflicha yetkazildi.

Viloyat IIB boshlig‘i T.Ismailov mahalla yettiligi faollari, keng jamoatchilik, qo‘ni-qo‘shnilar qolaversa, har bir fuqaro bu kabi salbiy holatlarni sodir bo‘lishiga tomoshabin bo‘lib emas, balki har bir holatga bee’tibor bo‘lmasdan uni oldini olishga harakat qilishi, mahallada bo‘layotgan noxush holatlarga barcha mas’uliyatni his etgan holda yondoshishi, lozimligi to‘g‘risida fikr bildirib, mahalla faollarining, tegishli idora vakillarining jinoyat sodir etilgunga qadar bo‘lgan faoliyatiga keskin tanqidiy baho berib o‘tdi.

Shu bilan birga yig‘ilishda ishtirok etgan jamoatchilik vakillari ushbu sodir etilgan jinoyatga o‘zlarining munosabatlarini bo‘ldirib o‘tishdi.

Muhokama yig‘ilishi yakunida, viloyat IIB boshlig‘i tomonidan Termiz shahar hududida, bu kabi jinoyatlarni sodir etilishiga yo‘l qo‘ymaslik yuzasidan tegishli mutasaddilarga muhim chora-tadbirlar belgilanib, aniq vazifalar yuklatildi.