Yurtimizda xotin-qizlarning ijtimoiy faolligini oshirish, ularni har tomonlama qo‘llab-quvvatlash, manfaatlarini himoya qilish, Vatan taraqqiyoti va jamiyat hayotidagi o‘rnini kuchaytirish borasidagi ishlar davlat siyosatining ustuvor yo‘nalishlaridan biri hisoblanadi.

Shu munosabat bilan yurtimizda ayollarni asrab-avaylash, ularga hurmat ehtirom ko‘rsatish, ma’naviy va intellektual salohiyatini yuksaltirish, oilalarning barqarorligini ta’minlashga doimiy e’tibor qaratib kelinmoqda.

O‘zbekiston Respublikasi Ichki ishlar vazirining 2024 yil 23 fevral kunidagi “Ichki ishlar organlarida 8 mart “Xalqaro xotin-qizlar kuni”ni nishonlashga tayyorgarlik ko‘rish va uni o‘tkazish to‘g‘risida”gi farmoyishining ijrosini ta’minlagan holda, joriy yilning 7 mart kuni viloyat ichki ishlar boshqarmasida 8-mart – Xalqaro xotin-qizlar kuni bayrami yuqori saviyada o‘tkazildi.

Tadbirda viloyat Ichki ishlar organlarida xizmat qilib kelayotgan xodimalar, xizmat vazifasini bajarish vaqtida halok bo‘lgan xodimlarning oila a’zolari hamda Viloyat ichki ishlar boshqarmasining faxriy xodimalari taklif etilib bayram dasturxoni yozildi.

Bayram tadbirida viloyat IIB boshlig‘i polkovnik Ismailov Timur Kamalatdinovich ishtirok etib, sana munosabati bilan barcha ayollarni muborakbod etdi.

Shundan so‘ng, xizmat faoliyati davomida yuqori natijalarga erishib kelayotgan xodimalar orasidan O‘zbekiston Respublikasi Prezidentining Farmoni bilan 1 nafari “Sodiq xizmatlari uchun” davlat mukofoti bilan taqdirlangan bo‘lsa, Ichki ishlar vazirining buyrug‘iga asosan xotin-qizlarning 1 nafari “A’lo xizmatlari uchun”, 2 nafari “I va III darajali Ichki ishlar organlarida benuqson xizmatlari uchun ko‘krak nishoni”, 1 nafari Ichki ishlar vazirligining “Faxriy yorlig‘i” bilan, 1 nafari Ichki ishlar vazirining “Esdalik qo‘l soati”, 1 nafari ichki ishlar vazirining “Qimmatbaho kitoblar to‘plami” bilan taqdirlangan bo‘lsa, 1 nafar xodima ayolga  muddatidan oldin “katta leytenant” maxsus unvoni bilan berildi.

Shuningdek, viloyat IIB boshlig‘ining tegishli buyrug‘iga asosan o‘tkazilgan “Fidoyi ayol xodima” ko‘rik tanlovining viloyat bosqichida faxrli o‘rinni qo‘lga kiritgan xodimalarga pul mukofotlari topshirildi.

Bundan tashqari, viloyat IIB boshlig‘ining tegishli buyrug‘iga asosan viloyat ichki ishlar organlarida xizmat olib borayotgan barcha xodimalarga bir martalik pul mukofoti hamda viloyat IIB birlashgan Kasaba uyushmasi kengashining esdalik sovg‘alari bayram tadbiriga tashrif buyurganlarga topshirildi.