Ichki ishlar organlarida “Sog‘lom oila – sog‘lom jamiyat” g‘oyasini tatbiq etish, oilaviy qadriyatlarni saqlash va rivojlantirish, yoshlarni mustaqil hayotga tayyorlash, dunyoqarashi va ma’naviyatini yuksaltirish, namunali oilalarning hayotiy tajribalarini ommalashtirish hamda O‘zbekiston  Respublikasi IIVning 2022 yil 15 fevral kunidagi “Ichki ishlar organlarida “Namunali oila” ko‘rik-tanlovini o‘tkazish to‘g‘risida”gi tegishli buyrug‘i ijrosini ta’minlash maqsadida joriy yilning 8 aprel kuni viloyat Ichki ishlar organlari xodimlari oilalari o‘rtasida “Namunali oila” ko‘rik tanlovi o‘tkazildi.

Mazkur ko‘rik-tanlovda ichki ishlar organlarida kamida 5 yil amaliy ish stajiga ega, oila qurganiga 8 yil to‘lgan (ma’lumot uchun; xodimlarning 7 – 15 yosh oralig‘idagi farzandlari ko‘rik-tanlovda ishtirok etishlari mumkin), harakatdagi intizomiy jazosi mavjud bo‘lmagan, viloyat IIBning tarkibiy tuzilmalari va hududiy bo‘linmalaridan jami 12 ta oila ishtirok etishdi.

Ko‘rik-tanlov shartlarini bajarish davomida ishtirokchi xodimlar va ularning oila a’zolari o‘z iste’dod va qobiliyatlarini namoyish etishdi.

Qizg‘in va munozarali baxslardan so‘ng, faxrli 3-o‘ringa Bandixon tumani IIB Jamoat xavfsizlik xizmati Huquqbuzarliklar profilaktikasi bo‘linmasi profilaktika katta inspektori kapitan Boyqobilov Zafar Abdumurodovich oilasi, 2-o‘ringa Angor tumani IIB Jamoat xavfsizlik xizmati Huquqbuzarliklar profilaktikasi bòlinmasi profilaktika katta inspektori mayor Xalturaev Davlatmurod Abdikadirovich oilasi munosib deb topilgan bo‘lsa, Sherobod tumani IIB Jamoat xavfsizlik xizmati Huquqbuzarliklar profilaktikasi  bo‘linmasi ijtimoiy profilaktika guruhi katta inspektori mayor Normurodov Elmurod Yo‘ldoshevichning oilasi 1-o‘ringa munosib deb topilib, mazkur ko‘rik-tanlovning respublika bosqichiga yo‘llanmani qo‘lga kiritdi.

Shuningdek, tanlovda ishtirok etgan oilalar, turli nominatsiyalar bo‘yicha diplom va boshqarmaning esdalik sovg‘alari hamda kitoblar jamlanmalari bilan taqdirlandi.

Mazkur tanlov xodimlar va ularning oila a’zolarining iste’dodini yuzaga chiqarish, yosh avlodni vatanparvarlik ruhida tarbiyalash, viloyat IIB tizimida xizmat olib borayotgan xodimlar va ularning oilalarini har tomonlama qo‘llab-quvvatlashda muhim omil bo‘ldi desak, mubolag‘a bo‘lmaydi.