O‘zbekiston Respublikasi Prezidentining 2023 yil 27 noyabrdagi PF-200-son Farmoni bilan tasdiqlangan Korrupsiyaga qarshi kurashish bo‘yicha 2023-2024 yillarga mo‘ljallangan davlat dasturining 25-bandida “Yoshlarda korrupsiyaga nisbatan toqatsiz munosabatni shakllantirish” hamda ta’lim dargohlaridagi o‘quvchi yoshlar ongida Vatan tuyg‘usini shakllantirish maqsadida, “Vatan tayanchi”  shiori ostida joriy yilning 27 yanvar kuni Muzrabot tumani “Do‘slik” mahallasida joylashgan 51-sonli umumiy o‘rta-ta’lim maktabida tahsil olayotgan boshlang‘ich hamda yuqori sinf o‘quvchilariga viloyat Ichki ishlar boshqarmasining bir guruh xodimlari ishtirokida davra suhbatlari va uchrashuvlar tashkil etildi.

Mazkur uchrashuvda ushbu maktabda tahsil olayotgan o‘quvchilarga ichki ishlar organlari xodimlari ta’lim dargohlarida chuqur bilim olishlari, bo‘sh vaqtlarini foydali mashg‘ulotlar bilan shug‘ullanishlari natijasida ularning shaxsiy hayotida, tanlagan kasbida va sport sohasida erishgan yutuqlari, hozirgi kunda ichki ishlar organlari tizimida olib borilayotgan islohotlar ortidan xodimlar uchun yaratilayotgan shart-sharoitlar shuningdek Vatanimiz tinchligini himoya qilish unga kamarbasta bo‘lish har bir o‘g‘il-qizning sharafli burchi ekanliklari hususiyda so‘z yuritishdi.

Uchrashuv davomida o‘quvchilar o‘zlarini qiziqtirgan savollariga soha mutaxassislari tomonidan javoblar olishdi.

Bir so‘z bilan aytganda, bu kabi vatanparvarlik uchrashuvlarini tashkil etib borish yoshlarda Vatanga mehr-muhabbat, vatanparvarlik, qalbida faxr va iftixor tuyg‘ularini shakllantirishda muhim ahamiyat kasb etadi.