O‘zbekiston Respublikasi Ichki ishlar vazirligining 2021 yil 27 avgustdagi “Ichki ishlar organlarida uzluksiz o‘quv-karera jarayoni tizimini tashkil etish to‘g‘risida”gi buyrug‘i hamda Surxondaryo viloyati ichki ishlar organlarining ofitserlik va safdorlik lavozimlariga tanlov asosida xizmatga qabul qilingan xodimlar bilan Surxondaryo viloyati IIB boshlig‘ining 2023 yil 10 dekabr kunidagi tegishli farmoyishiga asosan, joriy yilning 11 dekabr kunidan 2024 yilning 11 yanvar kuniga qadar Janubiy-operativ qo‘mondonligi tasarrufiga kiruvchi harbiy qism o‘quv bazasida boshlang‘ich kasbiy tayyorgarlik o‘quv mashg‘ulotlari o‘tkazilmoqda.

Mazkur o‘quv yig‘inini tashkil etishdan asosiy maqsad, viloyat ichki ishlar organlariga to‘g‘ridan-to‘g‘ri tanlov asosida qabul qilingan xodimlarning boshlang‘ich kasbiy ko‘nikmalarini shakllantirish, fuqarolar bilan muloqot jarayonida kasbiy mahorati, tezkor qaror qabul qilish, vaziyatni to‘g‘ri baholash hamda muomala madaniyatini yanada oshirishdan iboratdir.

O‘quv yig‘inlarini samarali tashkil etishda, sohaviy xizmatlarning amaliy tajribaga boy va yuqori malakaga ega ilmiy-pedagog xodimlar hamda mutaxassislar shuningdek, harbiy qismning malakali harbiy xizmatchilari jalb etilgan.

Joriy yilning 11 dekabr kuni boshlang‘ich kasbiy o‘quv yig‘inlariga jalb qilingan 20 nafar xodimlarga viloyat Ichki ishlar boshqarmasi Ma’naviy-ma’rifiy ishlar va kadrlar bilan ta’minlash xizmati mas’ul xodimlari hamda harbiy qism harbiy xizmatchilari tomonidan o‘quv yig‘ini oldi yo‘riqnomasi o‘tkazildi.

O‘tkazilgan o‘quv yig‘ini oldi yo‘riqnomada boshlang‘ich kasbiy o‘quv yig‘inlariga jalb qilingan 20 nafar xodimlarga kun tartibiga hamda o‘rnatilgan tartib-intizomga qat’iy rioya qilishlari, o‘quv dasturida belgilab berilgan mavzularni to‘liq o‘zlashtirishlari lozimligi, o‘quv yig‘ini yakunida sinovlar qabul qilinishi, mazkur sinovlardan muvofaqiyatli o‘tgan xodimlarga belgilangan namunadagi sertifikatlar topshirilishi ma’lum qilindi.