Insondagi eng oliy tuyg‘u bu - Vatanparvarlik tuyg‘usidir. O‘zi tug‘ilib-o‘sgan ona yurtini jon qadar sevadigan, o‘zga yurt tabiatidan o‘z yurti tabiatichalik zavq ololmaydigan, diyoridagi katta-kichik yutuqlardan fahrlanadigan, butun aql-zakovati, qalb qo‘ri, kuch va imkoniyatini shu jamiyat rivojiga baxshida eta olgan insondagina bu tuyg‘u namoyon bo‘ladi.

O‘zbekiston Resublikasi davlat mustaqilligining o‘ttiz to‘rt yilligi bayrami munosabati bilan, Ichki ishlar vazirining 2025-yil 31-iyuldagi va viloyat ichki ishlar boshqarmasi boshlig‘ning 2025-yil 21-avgust kunidagi tegishli farmoyishi dasturi ijrosini ta’minlash maqsadida, joriy yilning 25-avgust kuni Surxondaryo viloyati ichki ishlar boshqarmasi shaxsiy tarkibi va soha faxriylari ishtirokida “Vatan uchun, millat uchun, xalq uchun!” degan bosh g‘oya asosida “Uch avlod uchrashuvi” o‘tkazildi.

Uchrashuvda, dastlab viloyat ichki ishlar boshqarmasi Ma’naviy-ma’rifiy ishlar va kadrlar bilan ta’minlash xizmati boshlig‘i o‘rinbosari mayor Nodir Xoliqov so‘zga chiqib, mustaqilligimizning o‘ttiz to‘rt yillik bayrami munosabati bilan uchrashuv qatnashchilarini muborakbot etib, jonajon yurtimizda hukm surayotgan tinchlik-osoyishtalik, millatlararo totuvlik, bag‘rikenglik muhitini ko‘z qorachig‘idek asrab-avaylash, kelgusi avlodlarni shu ruhda kamol toptirish muqaddas burch ekanligini ta’kidlab o‘tdi.

Shundan so‘ng, viloyat ichki ishlar boshqarmasi faxriylar kengashi a’zolari so‘zga chiqishib, uzoq yillik mazmunli hayoti va mehnat faoliyati davomida to‘plagan boy tajribalari, xizmat davridagi o‘ziga xos qiyinchiliklar va mashaqqatlar haqida so‘zlab, bugungi kunda hukumatimiz tomonidan nuroniylar qolaversa ichki ishlar organlari xodimlari uchun yaratilayotgan shar-sharoitlardan oqilona foydalanish kerakligi, el-yurt ravnaqi yo‘lida mamlakatimiz rahbariga yaqin ko‘makchi, kamarbasta bo‘lish lozimligi, faxriy ustozlar tizimida xizmat olib borayotgan yosh xodimlar uchun doimiy ravishda mas’ul ekanliklarini ta’kidlab o‘tdilar.

Tashkil etilgan mazkur uchrashuvdan so‘ng, soha faxriylari va xodimlar e’tiboriga Surxondaryo viloyati musiqali drama teatrining ijodiy jamoasi tomonidan sahnalashtirilgan “Kalvak Maxsum” nomli spektakli namoyish etildi.

Albatta bu kabi ma’naviy-ma’rifiy tadbirlarni muntazam ravishda tashkillashtirib borish, xodimlarning madaniyat va san’atning turli sohalariga bo‘lgan qiziqishlarini oshirish, ma’naviy dunyoqarashini yuksaltirish, tariximiz, milliy qadriyatlarimizga hurmat hamda ularni vatanparvarlik ruhida tarbiyalashda, muhim ahamiyat kasb etadi.