Bugun ichki ishlar organlarida uzoq yillar samarali xizmat olib borgan, ichki ishlar organi faxriysi, marhum ustoz iste’fodagi polkovnik Abdusamat Bozorboevning yashagan xonadonlarida ularning yorqin xotirasiga bag‘ishlab tashkil etilgan “Uy muzeyi”ning ochilish marosimi tashkil etildi.

Ushbu uy muzeyi ochilish marosimida viloyat ichki ishlar boshqarmasi rahbariyati, faxriy ustozlar, yosh xodimlar, o‘quvchi va kursantlar hamda marhum Abdusamat Bozorboevning farzandlari oila a’zolari ishtirok etishdi.

Tashkil etilgan ushbu uy muzeyini ochish bahonasida, ustozning shogirdlari ularni xotirlashar ekan, ustozning uzoq yillik mazmunli hayoti va xizmat faoliyati davomida to‘plagan ma’lumotlari, erishgan yutuqlari, xizmat davridagi o‘ziga xos qiyinchilik va mashaqqatlari haqida so‘zlab berishdi.

Tadbirda, viloyat ichki ishlar boshqarmasi boshlig‘i o‘rinbosari podpolkovnik Sherzod Shadiev ishtirok etib, ushbu uy muzeyini ochilishi hech shubhasiz, ichki ishlar organlari faxriy ustozlari hamda yosh xodimlar o‘rtasida o‘zaro hamkorlikni “yangi bosqich”ga olib chiqib, faxriyning boy hayotiy va xizmatdagi tajribalarini yoshlar o‘rganishi ortida xodimlarda vatanga, kasbiga sadoqat tuyg‘ularini yanada kamol toptirishda muhim ahamiyat kasb etishini, bundan buyon faxriylar hamda yosh xodimlar o‘zaro hamkorlikdagi amalga oshiriladigan ishlar, shuningdek, ularni har tomonlama qo‘llab-quvvatlash masalalari doimgidanda ko‘proq e’tibor markazida bo‘lishini ta’kidlab o‘tdi.

Albatta tashkil etilgan ushbu uy muzeyi marhum ustozlarning nomini abadiylashtirish bilan birga, yosh avlod ongida ustozlarga bo‘lgan hurmat, Vatanga bo‘lgan muhabbat tuyg‘ularini yanada oshirishda muhim ahamiyat kasb etadi.