14-yanvar O‘zbekiston Respublikasi suvereniteti, hududiy yaxlitligi, aholining tinch hayoti va xavfsizligini himoya qiladigan kasb egalari – Vatan himoyachilari kuni va O‘zbekiston Respublikasi Qurolli kuchlari tashkil topgan kun sifatida nishonlanmoqda.

Shu munosabat bilan Viloyat Ichki ishlar boshqarmasi boshlig‘ining     2023- yil 9-yanvar kunidagi “O‘zbekiston Respublikasi Qurolli Kuchlari tashkil etilganligining 32 yilligini hamda “14-yanvar Vatan himoyachilari kuni”ni nishonlashga tayyorgarlik ko‘rish va uni yuqori saviyada o‘tkazish to‘g‘risida”gi  1-son farmoyishining ijrosini ta’minlash maqsadida, Termiz davlat universiteti bilan hamkorlikda bayram tadbiri tashkil etildi.

Tadbirda viloyat ichki ishlar boshqarmasi Ma’naviy-ma’rifiy ishlar va kadrlar bilan ta’minlash xizmati boshlig‘i o‘rinbosari mayor X.Nurmatov va mas’ul xodimlari, universitet yoshlar masalalari bo‘yicha prorektori O.Shofiev, professor-o‘qituvchilar hamda talabalar ishtirok etishdi.

Tadbirda viloyat Ichki ishlar boshqarmasiga tegishli bo‘lgan maxsus texnika va qurol aslahalar namoyishi tadbir ishtirokchilarida yuqori tasurotlar uyg‘otgan bo‘lsa xodimlarning jangovar va ko‘rgazmali chiqishlari esa mazkur tadbirga o‘zgacha shukuh bag‘shlab, yoshlarda ushbu sohaga qiziqish uyg‘otdi.

Shuningdek, Universitetninng besh ming nafar talabasini qamrab olgan mazkur tadbirda, vatanni madh etuvchi kuy-qo‘shiqlar ham namoyish etildi.

Bir so‘z bilan aytganda, bu kabi vatanparvarlik tadbirlari talaba-yoshlarda Vatanga mehr-muhabbat, vatanparvarlik, qalbida faxr tuyg‘usini uyg‘otishda muhim ahamiyat kasb etadi.