So‘nggi yillarda Prezidentimiz tashabbuslari bilan barcha sohalar qatori ichki ishlar organlari tizimida ham muhim islohotlar amalga oshirilib kelinmoqda.

Tizimda amalga oshirilayotgan sa’y-harakatlar natijasi xalq manfaatlariga xizmat qiladigan, ularning haq-huquqlari yo‘lida dasturulamal bo‘la oladigan tuzilmaga aylanayotganligi ayni haqiqat. Albatta bu yo‘nalishda Ichki ishlar organlari xodimlarining o‘rni alohida ahamiyat kasb etadi.

Surxondaryo  viloyati ichki ishlar boshqarmasida viloyat IIB huzuridagi Tergov boshqarmasi, Ekspert-kriminalistika markazi, Migratsiya va fuqarolikni rasmiylashtirish boshqarmasi va ularning quyi tizimdagi xodimlari o‘rtasida “Respublikada ichki ishlar xodimlari tomonidan sodir etilgan qonun buzilishi va salbiy holatlar” shaxsiy tarkib e’tiboriga yetkazilib, kelgusida qonuniylikni ta’minlash, ijrochilik va xizmat intizomiga rioya qilishga bag‘ishlangan video selektor tarzidagi tanqidiy yig‘ilish bo‘lib o‘tdi.

Yig‘ilishda, O‘zbekiston Respublikasi IIV huzuridagi Tergov departamenti mas’ul xodimi podpolkovnik G‘olibjon Nabiev, viloyat IIB huzuridagi Tergov boshqarmasi boshlig‘i o‘rinbosari podpolkovnik Nuriddin Xudjamuradov, IIV Shaxsiy xavfsizlik bosh boshqarmasi Surxondaryo  viloyati bo‘yicha boshqarmasi boshlig‘i hamda “X.Sulaymonova” nomidagi Respublika sud-ekspertiza markazi Surxondaryo viloyat bo‘limi mudiri Mirsohib Qo‘ng‘irotovlar ishtirok etib, yig‘ilish ishtirokchilariga mavzu doirasida atroflicha ma’lumotlar berib o‘tishdi.

Shuningdek, O‘zbekiston Respublikasi IIVning 2024 yil 26 fevraldagi “Ayrim protsessual harakatlar yoki boshqa tadbirlarni ichki ishlar organlarining ma’muriy binolarida amalga oshirish tartibi to‘g‘risidagi yo‘riqnomani tasdiqlash haqida”gi 101-sonli buyrug‘ida belgilangan vazifalar yuzasidan tegishli topshiriq hamda ko‘rsatmalar berildi.

Bundan tashqari, Sud-ekspertiza turlari va jinoyat ishlarida davlat hisobidan advokatlarning ishtirokini ta’minlash bo‘yicha o‘quv mashg‘ulotlari ham o‘tkazildi. O‘quv mashg‘uloti davomida ishtirokchilar o‘zlarini qiziqtirgan savollariga atroflicha javoblar olishdi.