O‘zbekiston Respublikasi Ichki ishlar vazirining 2021 yil 15 iyuldagi  “Ichki ishlar organlari faoliyatida faxriy xodimlarning rolini kuchaytirish chora-tadbirlari to‘g‘risida”gi tegishli buyrug‘i ijrosini ta’minlash maqsadida, joriy yilning 24 avgust kuni Surxondaryo viloyati ichki ishlar organlarida “Eng yaxshi Faxriy xodim” ko‘rik-tanlovining viloyat bosqichi o‘tkazildi.

Ushbu tanlovda boshqarmaning sohaviy xizmatlari hamda shahar-tuman IIBlarining faxriy xodimlari ishtirok etishdi.

Mazkur tanlov nizomiga ko‘ra faxriy xodimlar 3 ta shart asosida, dastlabki shartda “Shaxmat va shashka” sport turlari bo‘yicha o‘zaro bellashuv olib borgan bo‘lsa, 2-shartda tanlov ishtirokchilarining yurtimiz hamda jaxonda bo‘layotgan voqea-hodisalardan qay darajada xabardorliklari yuzasidan savol-javob sharti o‘tkazildi. 3-shartda ishtirokchi faxriy xodimlarning ish faoliyatini aks ettiruvchi fotoalbom hamda qilingan ishlar ma’lumotnomasi o‘rganildi.

Tanlovning yakuniy natijalariga ko‘ra, iste’fodagi podpolkovnik Zokirjon Xudoymurodov 3-o‘rinni, iste’fodagi podpolkovnik Salom Qosimov 2-o‘rinni qo‘lga kiritgan bo‘lsa, iste’fodagi mayor Abdug‘affor Begimqulov  tanlovning mutloq g‘olibligini qo‘lga kiritib, respublika bosqichida ishtirok etish yo‘llanmasiga sazovor bo‘ldi.

Tanlovning g‘olib va sovrindorlari boshqarma rahbariyati tomonidan diplom hamda qimmatbaho esdalik sovg‘alari bilan taqdirlanishdi.