O‘zbekiston Respublikasi ichki ishlar vazirining 2022 yil 3 martdagi tegishli buyrug‘i va Ichki ishlar vaziri o‘rinbosarining 2025 yil 26 maydagi tegishli farmoyishlari ijrosini ta’minlash maqsadida, 2025 yil iyun oyining birinchi o‘n kunligi mamlakat bo‘ylab “Korrupsiyaga qarshi kurashish dolzarb 10 kunligi” deb e’lon qilindi.

Ushbu tashabbus doirasida, Surxondaryo viloyati Ichki ishlar boshqarmasida video selektor tarzida uchrashuv tashkil etildi. Uchrashuvda boshqarma rahbariyati, shaxsiy tarkib, faxriylar hamda mas’ul xodimlar ishtirok etdi.

Uchrashuvda "Korrupsiya qarshi kurash - bizning burchimiz" mavzusida, Termiz Davlat Universiteti Yuridik fakulteti "Jinoyat huquqi va fuqarolik protsessi" kafedrasi katta o‘qituvchisi Islombek Raxmatulloevning ma’ruzasi tinglandi.

Tadbirda ichki ishlar organlarida korrupsiyaga qarshi murosasiz munosabatda bo‘lish, xizmat intizomi va qonuniylikka qat’iy rioya etish, pora va ta’magirlik kabi holatlarning oldini olish yuzasidan dolzarb masalalar muhokama qilindi. Shuningdek, shaxsiy tarkib o‘rtasida huquqbuzarliklarni o‘z vaqtida aniqlash, ularga chek qo‘yish, sabab va shart-sharoitlarni bartaraf etish bo‘yicha tegishli vazifalar belgilab olindi.

Uchrashuv davomida, rahbar xodimlarning shaxsan javobgarligi va mas’uliyatini oshirish, korrupsiyaviy omillarga nisbatan murosasiz munosabatni shakllantirish muhimligi alohida ta’kidlandi.

Tadbir so‘ngida qatnashchilar tomonidan korrupsiyaga qarshi kurashishda faol ishtirok etish, qonunchilikka qat’iy amal qilish va fuqarolar ishonchini oshirishga qaratilgan chora-tadbirlarni samarali amalga oshirish lozimligi qayd etildi.