Bugun, Muzrabot tumani 2-sektor hududidagi “Fidokor” mahallasi hududida Surxondaryo viloyati Ichki ishlar boshqarmasi boshlig‘i T.Ismailov, Muzrabot tumani hokimi A.Ismoilov, sektorlar hamda tegishli korxona va tashkilot rahbarlari hamda mahalla yettiligi faollari ishtirokida ushbu hududda sodir etilgan jinoyat muhokamasi o‘tkazildi.

Dastlab muhokama yig‘ilishida,  tuman hokimi A.Ismoilov kirish so‘zini olib, kun tartibiga qo‘yilgan muhim masala yuzasidan qisqacha ma’lumot berib o‘tdi. Shundan so‘ng, tuman Ichki ishlar bo‘limi boshlig‘i O‘.Shukurov Fidokor mahallasi hududida oila turmush doirasida sodir etilgan noxush holat sabablari va uning oqibatlari jamoatchilikka atroflicha yetkazildi.

Viloyat IIB boshlig‘i T.Ismailov har bir fuqaro bunday salbiy holatlarni sodir bo‘lishiga tomoshabin bo‘lib emas, balki uni oldini olishga harakat qilishi, mahallada bo‘layotgan noxush holatlarga barcha mas’uliyatni his etgan holda yondoshishi, lozimligi to‘g‘risida fikr bildirib, mahalla yettiligi faollari hamda ta’lim muassasasi rahbar va xodimlarining jinoyat sodir etilgunga qadar bo‘lgan faoliyatiga keskin tanqidiy baho berib o‘tdi.

Shu bilan birga yig‘ilishda ishtirok etgan jamoatchilik vakillari ushbu sodir etilgan jinoyatga o‘zlarining munosabatlarini bo‘ldirib o‘tishdi.

Muhokama yig‘ilishi yakunida, viloyat IIB boshlig‘i tomonidan tuman hududida, bu kabi jinoyatlarni sodir etilishiga yo‘l qo‘ymaslik yuzasidan tegishli mutasaddilarga muhim chora-tadbirlar va aniq vazifalar belgilab berildi.