Joriy yilning 10 iyun kuni “Ma’naviyat oyligi” doirasida Surxondaryo viloyati Ichki ishlar boshqarmasi shaxsiy tarkibi bilan “Ochiqlik – korrupsiyaning oldini olishdagi muhim vosita” mavzusida “Ma’naviyat va ma’rifat” darsi o‘tkazildi.

Mavzu tafsilotlari yuzasidan Termiz Davlat Universiteti Yuridik fakulteti mas’ul xodimi B.Shaymardonovning ma’ruzasi tinglandi.

“Ma’naviyat va ma’rifat” darsi davomida, Respublika hududida ichki ishlar organlari xodimlari tomonidan o‘tgan bir hafta davomida sodir etilgan qonun hamda xizmat intizomi buzilish holatlari to‘g‘risidagi ma’lumotlar O‘zbekiston Respublikasi IIV Shaxsiy xavfsizlik bosh boshqarmasi Surxondaryo viloyati bo‘yicha boshqarmasi mas’ul xodimi tomonidan shaxsiy tarkibga o‘qib eshittirilib, ba’zi xodimlarning yurish turishi, xizmat intizomi, qonunchilikka qat’iy rioya qilishi borasidagi xatti-harakatlari tanqid qilindi.

Shundan so‘ng, xizmat hududida jinoyat va huquqbuzarliklarni barvaqt oldini olish, jamoatchilik vakillari, mahalla faollari, fidokor yoshlar bilan o‘zaro hamkorlikda huquqbuzarliklar profilaktikasini samarali tashkil etib, sodir etilgan  jinoyatlarni issiq izidan fosh etish hamda qidiruvda bo‘lgan shaxslarni qo‘lga olib jazo muqarrarligini ta’minlashga erishgan ayrim profilaktika inspektori Surxondaryo viloyati IIB boshlig‘ining buyrug‘i bilan eng kam oylik ish xaqqining 10 (o‘n) barobari miqdorida pul mukofti bilan taqdirlandi. Shuningdek, ichki ishlar tizimida safdoshlariga o‘rnak bo‘lib kelayotgan hamda sport musobaqalarida yuqori natijalarga erishgan bir guruh ichki ishlar organlari xodimlari tashakkurnoma, medal, diplom va esdalik sovg‘alari bilan taqdirlangan bo‘lsa, viloyat hududida faoliyat olib borayotgan 10 nafar profilaktika inspektorlariga O‘zbekiston Respublikasi Ichki ishlar Vaziri o‘rinbosarining tavsiyasiga asosan, Oliy ta’lim muassasalarining Yurisprudensiya yo‘nalishiga sirtqi ta’limda tahsil olishlari uchun imtiyozli tavsiyanomalar tantanali ravishda topshirildi.

Surxondaryo viloyati IIB Axborot xizmati